iklan

POLÍTIKA

Reprezentante povu husu Governu tau atensaun ba infraestrutura bázika

Reprezentante povu husu Governu tau atensaun ba infraestrutura bázika

Estrada Bonuk ne'ebé hetan estragus fulan kotuk iha Munisipiu Manufahi ne'ebé agora dadaun komesa hadia ona: imajen/Tatoli, Hortencio Sanchez.

DILI, 08 abríl 2024 (TATOLI)—Reprezentante povu iha uma fukun Parlamentu Nasionál (PN), husu Governu liuhosi Ministériu Obra Públika (MOP) atu tau atensaun ba infraestrutura bázika hanesan estrada iha territóriu hodi fasilita movimentu transporte públiku no povu agrikultór bele lori produtu ba merkadu.

Deputadu CNRT, Natalino dos Santos, husu ezekutivu atu tau atensaun hodi normaliza mota Tafara iha Covalima tanba tempu udan fó ameasa tebes ba komunidade no no komunidade nia plantasaun komunidade.

“Husu Governu atu tau prioridade ba estrada husi Suai ba postu Maucatar, ne’ebé ninia kondisaun aat tebe-tebes no presiza tau atensaun kria kondisaun, nune’e bele fasilita populasaun sira bele transporta sira-nia produtu lokál mai merkadu Covalima.  No mós, Governu presiza tau atensaun ba estrada ligasaun husi Tilomar ba Fatumea,” Nia levanta kestaun ne’e liuhosi reuniaun plenária PN, segunda ne’e.

Nune’e mós, nia levanta atu hamatan ba ponte ida iha Beilaku-Zumalai liga suku Raemia, tanba bainhira tempu udan ne’e estudante sira labele mai eskola iha Beilaku, tan ne’e presiza atensaun. Aleinde ne’e, Estrada halo ligasaun ba suku Raemia mai postu Zumalai bainhira tempu udan ne’e defísil tebes sidadaun sira atu mai halo tratamentu saúde no faan sasán iha merkadu.

Deputadu CNRT, Marcos Soares Martins, kontinua husu MOP atu aselera prosesu konstrusaun no reabilitasaun estrada diresaun husi Gleno ba Letefoho no Atsabe no ba Hatulia A, tanba kondisaun estrada agora grave tebes.

Deputadu CNRT, Anacleto Freitas, dehan udan boot ne’ebé akontese iha 06 abríl 2024 rezulta ponte Sumaku iha suku Uma-Tolu kotu ligasaun entre husi diresaun postu Lacluta ba iha munisípiu Viqueque, ida-ne’e dalan úniku tanba ho akontesimentu ne’e difikulta movimentu transporte públiku, nune’e ministériu kompetente presiza tau atensaun urjente.

Aleinde mota Ailembata iha postu administrativu Uatulari, suku Babulo ne’ebé tempu udan sempre fó ameasa ba komunidade nia hela fatin no mós transporte públiku husi diresaun postu Uatucarbau mai munisípiu Viqueque.

“Foin daudaun udan boot, iha 30 marsu, iha postu Uatulari rezultadu uma-kain 19 ne’ebé hetan estragu husi mota Ailembata, tanba mota suli tuir fali estrada, nune’e hamosu inundasaun. Nune’e, husu IGEADE, I.P JE atu halo atendimentu urjente atu normaliza,” nia dehan.

MOP presiza konstrui mós ponte iha mota Ailembata hodi bele fasilita movimentasaun transporte públiku.

Deputadu CNRT, Gabriel Ximenes, husu MOP tau atensaun iha parte kosta súl iha tempu udan makaas tanba iha postu Barique, suku Abat-oan atu ultrapasa ba Welaluhu ne’e mota boot tebes no iha parte Luca ninian ne’e, ida-ne’e mós estudante sira atu mai eskola tenke hakat mota.

Vise Ministru ba asuntu Parlamentár, Adérito Hugo da Costa, rejista preokupasaun husi reprezentante povu iha PN no sei enkamiña ba ministériu tutela hodi fó atensaun.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!