Estudante rihun 26-resin iha Baucau konsume ona ai-moruk lumbriga
BAUCAU, 11 abríl 2024 (TATOLI) – Estudante hamutuk 26.972 iha Baucau komsume ona ai-moruk albendazole hodi prevene moras lumbriga.
Diretór Servisu Munisipál Saúde Baucau, Cristiano Belo, esplika, estudante hirak-ne’e korresponde ba 88% hosi totál alvu 30.634 idade hosi tinan 6 too 14 ne’ebé halao estudu iha ensinu báziku primeiru to’o terseiru siklu ho totál eskola hamutuk 185.
“Intensaun ba fó ai-moruk lumbriga ne’e la’ós atu redús, maibé halo prevensaun, tanba ne’e mekanismu di’ak atu labarik sira iha vontade atu tuir prosesu aprendizajen,” Diretór Servisu Munisipál Saúde hateten iha Vila Antiga, kinta ne’e.
Saúde Baucau, hahú halao distribuisaun ai-morukoruk albendazole ba labarik estudante sira iha loron-14 marsu nu’udar parte programa hosi rezultadu serbisu hamutuk entre Ministériu Saúde (MS) ho Ministériu Edukasaun (ME) nune’e distribui hosi profesór, enkuantu pesóal saúde halo monitorizasaun.
Governu liuhosi Ministériu Saúde no Ministéiru Edukasaun implementa programa referida tanba hakarak prevensaun moras lumbriga bazea ba kondisaun eskola iha Baucau hanesan saneamentu difikulta estudante sira soe fo’er boot arbiru.
“Ohin ita kontinua distribui, tuir planu aban konklui ona,” Cristiano Belo akresenta.
Servisu Munisipál Saúde Baucau prepara estoke ai-moruk albendazole miligramos 400 hodi distribui ba eskola 185 ho total estudante 30.634.
Nune’e tuir dadus eskola hamutuk 161 korresponde ho 88% mak konsume ona no hela eskola 24 ka 12% hosi estudante hamutuk 3.662 mak sei finaliza iha loron-sesta.
Jornalista : Natalino Belo
Editór : Evaristo Soares Martins
