Saúde Baucau rejista pasiente dengue 113
BAUCAU, 11 abríl 2024 (TATOLI) – Servisu Munisipál Saúde Baucau rejista pasiente sofre moras dengue hamutuk 113.
Diretór Servisu Munisipál Saúde Baucau, Cristiano Belo, esplika, hosi númeru referidu afeiñta pasiente sira hosi fulan-janeiru to’o inísiu abríl kompostu hosi feto na’in-52 no mane na’in-61 ne’ebé maioria afeiñta ba ba labarik hosi idade 5 to’o 15.
“Kazu ne’e ita haree nafatin konsentra de’it iha Baucau vila, barak liu mak iha Vila Nova no Vila Antiga,” Diretór Servisu Munisipál Saúde Baucau hateten iha Vila Antiga, kinta ne’e.
Kauza hosi moras dengue tanba komunidade sedauk iha konsiénsia hodi hamoos lixu sira iha uma, liuliu tempu udan hanesan lata mamuk ne’ebé bee nalihun iha laran hodi hamosu susuk.
Saúde Baucau husu atu komunidade nafatin hamoos lixu sira-ne’ebé besik uma no bairru nu’udar parte prevensaun hodi hadook aan hosi moras dengue.
“Fatór seluk mak ema ne’ebé afetadu ona ba hela fali postu seluk bele daet ba ema seluk, tanba iha ona virus nune’e fo impaktu ba ema seluk,” Cristiano Belo akresenta.
Servisu Munisipál Saúde Baucau liuhosi ekipa halo ona fumigasaun ba uma hamutuk 8.732 inklui distribui ai-moruk abate hamutuk 3.139 nune’e prevene susuk hodi hamosu moras dengue.
Jornalista : Natalino Belo
Editór : Evaristo Soares Martins
