iklan

INTERNASIONÁL, HEADLINE

Artista Calema sei anima povu TL hodi selebra Festival Tasifest

Artista Calema sei anima povu TL hodi selebra Festival Tasifest

DILI, 12 abríl 2024 (TATOLI) – Xefe Ezekutivu Even2u, Luís Simões, hateten artista hosi São Tomé e Principe Calema, sei anima Timor-Leste iha fulan-Maiu, durante loron rua, ho objetivu atu selebra Festival Tasifest.

“Ami sei lori artista koñesidu, Calema hodi mai anima timoroan sira iha loron 18-19 maiu iha portu Dili”, Luís Simões hatan ba pergunta TATOLI liuhosi Watshap, ohin.

Nia esplika, preparativu atu lori Calema mai, liuhosi prosesu naruk maibé ikus mai aseita no atu mai duni hodi anima povu Timor-Leste.

“Even2u, hahú ko’alia ba ekipa jestaun Calema iha tinan rua ba kotuk, tanba koñese malu di’ak ho ha’u, entaun ita haree tempu kleur uitoan, tanba Calema, hanesan banda rekezitadu, entaun ema sempre bolu hela de’it iha Portugal, Europa no Áfrika, entaun sira-nia ajenda nakonu. Agora mak eventu ida ho signifikadu boot atu lori sira mai iha Timor-Leste”, nia hateten.

Nia subliña, Artista Calema na’in-rua sei mai husi São Tomé e Principe, hanesan nasaun ida ne’ebé mak hola parte husi nasaun Komunidade País Lian Portugés (CPLP, sigla portugés ), ne’ebé ho nivel dezenvolvimentu hanesan ho Timor-Leste.

“Calema hahú sira-nia kareira kanta iha eventu kiik-oan iha ne’eba, hanesan artista timoroan sira mós hahú kanta iha eventu kiik sira iha ne’e, entaun sira bele sai ezemplu ba ita-nia artista katak maske mai husi realidade hanesan, bele mós esforsu maka’as atu sai koñesidu hanesan Calema no hetan susesu boot iha rai liur’’, nia konta.

Nia dehan, billete ne’ebé mak ema atu asesu ba konsertu Calema nian, iha oin tolu, mak asesu ba Very important Person (VIP) ho folin $150, tuir fali mak ho folin $10 no ikus liu mak folin $4.

“Hosi eventu ne’e, ami-nia fundu limitadu, entaun ajuda parseiru sira mak sai esponsór, atu  ema se de’it bele asesu ba eventu ida-ne’e. Entaun ami iha tipu billete-tolu ne’ebé mak lahanesan, ida mak folin barratu liu ho $4”, nia afirma.

Nia relata, bilete ida-ne’e vale ba loron rua, hahú hosi 18-19 maiu. Objetivu prinsipál hosi animasaun mak atu lori pás no estabilidade, tanba ne’e Even2u, halo kálkulu katak durante loron ema hamutuk rihun 30 mak sei asiste.

“Ami-nia billete validu ba loron-rua, ami la faan billete ba loron ida de’it, tanba ami lakohi atu ema mai haree artista internasionál de’it, ami hakarak sira mai haree artista nasionál mós, tanba ami hakarak sira valoriza mós artista rai-laran, entaun ami-nia tarjetu ba eventu loron rua, ema hamutuk rihun tolu-nulu”, nia haktuir.

Nia relata, Calema hanesan banda ne’ebé mak di’ak liu ho razaun balun katak timoroan gosta duni no rona bebeik sira-nia múzika, maske la identifika didiak sira-nia naran. Calema mós parseiru ho artista boot husi nasaun Arabia, Europa, Áfrika, Amérika latina no seluk tan.

“Sira durante ne’e seidauk halo konsertu iha ASEAN, entaun hanesan oportunidade úniku ida  atu sira mai no liuhosi sira-nia vijibilidade boot hodi kontribui atu promove artista timoroan sira”, nia dehan.

Ekipa hosi Even2u, kompostu ho ema internasionál na’in-rua, timoroan hamutuk 43. Ho idade  18 to’o 34 ho sira nia kreatividade, vontade no profisionalizmu hodi bele halo eventu ida-ne’e boot no kualidade internasionál.

“Kona-ba servisu, relasiona ba design, logo no materiál komunikasaun hothotu, ida-ne’e ami-nia ekipa mak halo hotu”, nia afirma.

Empreza Even2u, hahú iha 2018, servisu kona-ba organizadór eventu nian no mós produsaun vídeo no foto, atu funsionáriu permanente timoroan 10 no funsionáriu internasionál na’in-ida no servisu ho ajénsia internasionál no empreza lokál no mós Governu Timor-Leste.

FESTIVAL TASIFEST
TasiFest hanesan festivál dahuluk, ho objetivu atu halo tinan-tinan, ne’ebé organiza husi kompañia Even2u ho apoiu balun husi setór privadu sira. Festival TasiFest logo lenuk tanba lenuk hanesan espesie ne’ebé sofre barak liu ba poluisaun iha tasi. “Tasi,” liafuan ida-ne’ebé signifika tasi iha lian tetun, mak liafuan ida-ne’ebé hatudu katak ideia ida-ne’e mak atu sai buat ne’ebé loos iha Timor-Leste, no tasi mak parte ida husi Timor no Timor-Leste tomak. Tanba istória ne’e, liuhusi tasi mak timoroan sira hatene kona-ba mundu no mundu ne’e hatene Timor-Leste, liga ema, kultura, kostume no tradisaun sira, ne’ebé sai parte husi nasaun ne’ebé ita hotu hatene ohin loron.

TasiFest hanesan festivál ida ne’ebé mak hahú ho objetivu, lori juventude timoroan hamutuk atu hanoin kona-ba importánsia halo prezervasaun no konservasaun tasi nian no mós hanoin kona-ba impaktu lixu no importánsia atu jere lixu didiak iha lorloron. Atu halo ida-ne’e ami hanoin atu envolve artista múzika no artista husi pintura no kultura ho kontribuisaun sira-nia kreatividade, bele lori hanoin ida-ne’e no mensajen ida-ne’e ba ema barak liután.

Festivál ida-ne’e inklui mós semináriu kona-ba redusaun konsumu no jestaun plástiku no mos servisu ekolójiku no ekonomia azul mak relasiona ba tasi maibé halo modelu inovadór, ba atividade ami envolve empreza timorense balun no asosiasaun balun mak halo ona servisu relasiona ba tópiku ida-ne’e, atividade ida-ne’e sei realiza iha Cristo Rei. Ami mós atu halo workshop kona-ba arte sustentavel, halo resiklajen sasan atu halo arte no uza fali materiál sira ho maneira sustentavel no kreativu no mós kona-ba ativizmu artístiku, ami envolve artista sira timorense balun atu halo parte ida-ne’e iha Jardim 5 maiu.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!