MOP Viqueque kontinua kontrola projetu konstrusaun estrada rurál pakote 8 iha Ossu
VIQUEQUE, 12 abríl 2024 (TATOLI)-Diretór Servisu Obra Públika munisípiu Viqueque, Casildo Gomes Soares, informa, ekipa MOP kontinua kontrola implementa projetu estrada rurál hamutuk pakote ualu (8) iha Postu Administrativu Ossu, munisípiu Viqueque.
“Iha implementasaun Estrada daudaun sei la’o hela iha munisipál Viqueque atu liga ba suku rurál hamutuk pakote 8. Ho nia progresu servisu ne’ebé ami akompaña daudaun ne’e kontrusaun kontinua la’o no pakote ida finanliza ona”, Casildo Gomes Soares, hateten ba Agência TATOLI, iha salaun administrasaun Viqueque, ohin.
Nune’e Casildo Gomes Soares dehan, implementasaun projetu Estrada rurál ne’e ekipa enjiñeiru ho Obras públika munisípiu Viqueque halo akompaña hodi kontrola projetu fiziku sira.
“Kona-ba Estrada rurál ne’e ita-nia Governu servisu hamutuk ho Roads for Development (R4D-sigla inglés) iha Timor-Leste hodi implementa estrada área rurál no oinsa atu fasilita ita-nia abitante. Nune’e ha’u sente projetu rurál sira-ne’e banhira finaliza sei benifísia ba ita-nia abitante sira-ne’ebé hela iha área rurál no sira sei sente dezenvolvimentu iha ukun rasik. Ho Estrada sira-ne’e atu gia ita-nia abitante sira hodi buka moris no lori produtu lokál sira ba asesu merkadu”, Nia subliña.
Husi Estrada rurál ne’e nia relata, pakote balun uza alkatraun no balun uza sementu ka cor hodi estrada rurál ne’e tuir Bill of Quantity (BoQ).
Projetu pakote 8
Enkuantu projetu Estrada rurál pakote 8 ne’e finansia husi Governu no hetan apoia tékniku husi Organizasaun Internasionál R4D.
Pakote dahuluk, manutensaun rutina estrada munisipál Ossu liga ba Uagia-Nahareka 0+000-3+400 kilométru (km) implementa iha tinan 2019, konstrui hosi empreza Costa Key, UNIP Lda, gastu $74,385.35, atinje ba 23.48 %.
Enkuantu, projetu implementa iha tinan 2022 ba manutensaun rutina estrada munisipál Ossu liga ba Uagia-Nareka 3+400 -5+400 kilométru (km), konstrui hosi empreza Finlos-Costa, UNIP Lda, gastu $491,752.56, atinje ba 73.27 %.
Reabilitasaun estrada munisipál Ossu liga baUagia-Nareka 5+400 -7+400 kilométru (km), konstrui hosi empreza Wailay, UNIP Lda, gastu $507,050.73, atinji ba 100 %.
Reabilitasaun Estrada munisipál Ossu liga baUagia-Nareka 5+400 -7+400 kilométru (km), konstrui hosi empreza Finlos, UNIP Lda, gastu $491,785.11, atinji ba 15 %.
Reabilitasaun Estrada munisipál Ossu liga baUagia-Nareka 7+400 -9+400 kilométru (km), konstrui hosi empreza Lemadae, UNIP Lda, gastu $471,641.93, atinji ba 24 %.
Reabilitasaun Estrada munisipál Ossu liga baUagia-9+400 -11+400 kilométru (km), konstrui hosi empreza Marque, UNIP Lda, gastu $495,519.07, atinji ba 26 %. Reabilitasaun Estrada munisipál Ossu liga baUagia-11+400 -15+400 kilométru (km), konstrui hosi empreza UAITAU, UNIP Lda, gastu $560,059.97, atinji ba 15%.
Ikus liu, reabilitasaun estrada munisipál Ossu liga baUagia-15+400 -17+700 kilométru (km), konstrui hosi empreza Borala, UNIP Lda, gastu $743,000.00, prosesu impelementasaun iha tinan 2022.
Jornalista : Vitorino Lopes da Costa
Editór : Florencio Miranda Ximenes
