DILI, 12 abríl 2024 (TATOLI)–Ajénsia Teknolojia Informasaun no Komunikasaun Timor, Institutu Públiku (TIC Timor, I.P, sigla portugés) asina nota entendimentu ho Komisaun Nasionál Eleisaun (CNE, sigla portugés) ba asuntu rua iha área Teknolojia Informasaun no Komunikasaun.
“Asuntu rua ne’ebé ohin ita asina liuhusi nota entendimentu mak hanesan, TIC Timor, I.P sei fó asisténsia no konfigurasaun ba ekipamentu sistema servedór no rede konetividade integradu husi sentrál CNE nian ba munisípiu sira inklui CNE, sistema elektroniku, sistema inventoria, dijitalizasaun formuláriu supervizaun no sistema sira seluk ne’ebé CNE presiza iha futuru,” Diretór Ezekutivu TIC Ajénsia Timor, I.P, Venâncio Pinto, hateten, iha salaun CNE, Caicoli, sesta ne’e.
TIC Timor nia sistema aplikasaun sei ajuda CNE atu dezenvolve no apoia dezenvolvimentu infraestrutura teknolójia, informasaun no komunikasaun sira seluk.
“Ita sei fornese apoiu ba formasaun no kualifikasaun pesoál parte CNE nian kona-ba utilizasaun no operasionalizasaun serbisu sira ne’ebé presiza iha área Teknolojia Informasaun no Komunikasaun nian tuir nesesidade no pedidu husi parte segundu (CNE),” nia akresenta.
Notísia relevante : CNE lansa atividade edukasaun sívika hodi hasa’e taxa partisipasaun iha eleisaun suku
TIC Timor sei kontinua simu pedidu no resposta ba CNE ligasaun ho manutensaun ba asuntu sira ne’ebé relasiona ho asuntu Teknolojia Informasaun no Komunikasaun nian.
Diretór Ezekutivu Ajénsia TIC Timor, Venâcio Pinto, hateten, TIC Timor nu’udar instituisaun públiku ho nia natureza jurídika ne’ebé ho autonomia administrativa, finanseira, orsamentu no patrimóniu rasik, ne’ebé haktuir iha dekretu-lei númeru 29/2017.
Haktuir ba dekretu-lei númeru 46/2023 iha 28 jullu, orgánika IX Governu Konstitusionál tutela ba Ministériu Transporte no Komonikasaun (MTK), ne’ebé promulgadu iha área Teknolojia, Informasaun no Komunikasaun.
“Tanba ne’e, tuir baze ne’ebé iha atu dezenvolve di’ak liutan setór Informasaun, Komunikasaun no Teknolójia hodi hafasil serbisu ho kualidade di’ak ba instituisaun Governu sira hotu no ajénsia empreza Estadu sira hotu hodi eleva kuñesimentu, no promove dezenvolvimentu sósiu ekonómiku, diversifikasaun ekonomia, bem-estar nomós kualidade moris sidadaun sira-nian,” Venâncio Pinto, akresenta.
TIC Timor, I.P nia papél importante mak atu jere infraestrutura Governu eletróniku hodi asegura liña koneksaun ba liña ministeriu, ajénsia autónomu, instituisaun Governu no empreza públika sira hodi hetan serbisu konektividade, kolokasaun servidor, domíniu, korreiu eletróniku (sentru dadus) inklui website ne’ebé maka konektadu mai iha TIC Timor, I.P.
Nune’e, dezenvolve plataforma eletrónika hodi atinje Governu eletróniku no hala’o estudu hodi dezenvolve sistema TIC ba Governu, ajénsia autónomu no setór privadu, estabelese no dezenvolve padraun teknolojia informátika hanesan hardware, software, inklui asegura, interroperabilidade, interligasaun, sentralizasaun kustu no seguransa no fornese asesoria iha área TIC ba instituisaun Estadu sira hotu.
Nia dehan, pedidu ne’ebé CNE mak asegura serbisu eleisaun iha rai-laran no rai-liur, tanba ne’e kooperasaun Teknolojia, Informasaun no Komunikasaun importante tebes hodi fasilita serbisu sira CNE nian mais elektróniku ba sidadaun sira hotu.
Razaun kooperasaun servisu Teknolojia, Informasaun no Komunikasaun importante tebes ba papél CNE nian, tanba TIC bele dezenvolve tuir nesesidade iha kurtu, médiu no longu prazu hodi fasilita di’ak liu tan prestasaun serbisu kona-ba eleisaun nian ho objetivu redús movimentu sira la nesesáriu kona-ba matéria sosializasaun bele halo de’it online ka dijitalizasaun.
“Ajénsia TIC Timor bele transforma serbisu CNE nian ne’ebé iha agora mais elektróniku, liuhusi utilizasaun servisu Teknolojia, Informasaun no Komunikasaun,” nia dehan.
Liuhusi serbisu hamutuk ohin ne’e, CNE mós sei kontribui ba esforsu TIC Timor, I.P nian serbisu hodi hamenus gastu la nesesáriu sira iha área informatika, sentraliza no asegura dokumentu no informasaun iha sentru dadus Governu nian, fasilita asesu ba padraun teknolojia no aplikasaun ne’ebé modernu, seguru, atualizadu, dezenvolvidu no aseguru husi timor-oan rasik.
Iha fatin hanesan, Prezidente CNE, José da Costa Belo Pereira, hateten, CNE agradese ba TIC Timor ne’ebé ohin asina ona nota entendimentu hodi apoiu téknikamente dijitalizasaun sistema CNE nian.
“Ohin ne’e momentu importante ba ita hotu tanba TIC Timor no CNE nia papél importante hotu, liu-liu ko’alia kona-ba transparénsia ba eleisaun sira ne’ebé di’ak no dignu presiza transparénsia liu-liu baze dadus, liu-liu ba partidu polítiku ninian ne’ebé rejistu la’o presiza haree, supervizaun ne’ebé di’ak ba partidu polítiku sira durante halo eleisaun ne’ebé iha no ita moderniza ona ita-nia sistema,” José tenik.
Bainhira moderniza ona sistema arkivu sira ne’ebé uluk manuál bele moderniza hotu tanba agora mundu modernizasaun.”Website ne’ebé ita iha partidu polítiku sira bele asesu ona rezultadu eleisaun prezidensiál, parlamentár no suku, tanba baze dadus ne’e importante tebes sira atu haree no sei iha formasaun ba ita-nia IT sira, ida-ne’e mak ita moderniza ita-nia sistema no servisu,” nia hateten.
Jornalista : Arminda Fonseca
Editora : Julia Chatarina
