BAUCAU, 12 abríl 2024 (TATOLI) – Komandu Polísia Nasionál Timor-Leste (PNTL) kontinua husu membru sira-ne’ebé ne’ebé involve aan iha arte-marsiál atu entrega atributu organizasaun.
Komandante Pesoál Informasaun no Koordenadór Atividade Dezvinkulasaun, Superintendente Xefe, Arquimino Ramos, esplika, desizaun referidu bazeia ba despaxu Ministériu Interior (MI) loron 13 fulan-dezembru 2023, ne’ebé orienta Kuartel Jerál PNTL no komandu munisípiu hotu atu identifika membru sira-ne’ebé involve iha organizasaun arte-marsiál no rituál atu entrega atributu organizasaun tanba tuir tema PNTL tinan-2024 tempu to’o ona PNTL sai profisionál no reziliente.
“Ita enkoraja sira atu voluntariamente entrega farda di’akliu, se lae futuru serimónia mak ita rona informasaun ka keixa ruma, membru ne’e mak sei responsabiliza ba aktu ne’ebé nia komete,” Superintendente Xefe Arquimino Ramos hateten iha Vila Nova, sesta ne’e.
Objetivu Komandu PNTL prezensa ho komandu Baucau hanesan parte kontinuasaun hosi asaun ne’ebé PNTL halo ona hanesan juramentu, atu hasees aan hosi arte-marsiál no rituál tanba entrega ona atributu arte-marsiál iha resintu Palásiu Governu hanesan IKSPTL, PSHT no KORK iha loron-07 dezembru 2023.
PNTL liuhosi Komandu Jerál kontinua iha komitmentu hakbesik no enkoraja ba membru sira iha kada munisipiu ligadu ho arte-marsiál antes to’o faze desvinkulasaun hodi kompleta ho deklarasaun no fixa ba kada membru nune’e deklara ba públiku katak sei firme de’it iha PNTL hodi serbí estadu no povu.
“Membru sira sei asina deklarasaun ne’ebé governu no komandu prepara ona atu kolloka iha sira-nia fixa pesoál fó-sai ba públiku katak, membru ne’e dezvinkula ona husi arte-marsiál,” Superintendente Xefe Arquimino Ramos akresenta.
Komando Jerál kontinua husu ba membru hotu ne’ebé involva aan iha arte-marsiál no rituál atu koopera tanba futuru bainhira identifika kontinua envolve sei loke prosesu hodi hasai hosi instituisaun.
Totál membru PNTL ne’ebé antes ne’e entrega ona atributu organizasaun hamutuk 267, nune’e hosi númeru referedu iha komandu munisípiu Baucau hamutuk na’in-39.
Jornalista : Natalino Belo
Editór : Evaristo Soares Martins
