VIQUEQUE, 15 abríl 2024 (TATOLI)—Abitante husi aldeia Rai Hun, suku Uma-Ki’ik, postu administrativu Viqueque Vila, munisípiu Viqueque, ho inisiativa oferese rai ho medida ektare 100 ba Sekretaria Estadu Pekuária (SEP) hodi halo investimentu setór pekuária.
Sekretáriu Estadu Pekuária, José Viera de Araújo, hateten, ba oin sei haree prosesu kona-ba rai tanba asuntu ne’e sempre sai problema tanba durante ne’e ema halo investimentu laiha legalidade.
“Ohin ami halo sorumutu ho abitante no autoridade hodi prepara akta entegra rai husi abitante ba Governu. Nune’e, ba oin ami prosesa dokumentu legalidade rai nian ba Sekretaria Estadu Terra Propriendade no Autoridade munisipál atu ita bele hetan legalidade ne’ebé atribui husi Ministériu Justisa,” Sekretáriu Estadu José Viera, relata ba jornalista sira, iha sede suku Uma-Ki’ik.
Governante ne’e dehan, bainhira rai ne’e iha ona legalidade loloos, SEP sei halo investimentu pekuária hanesan hakiak animál karau, bibi no seluk tan.
“Polítika IX Governu Konstituisionál ba tinan-lima ne’e ita hakarak hasa’e produsaun animál. Entaun, agora ita tenke prepara rai hodi halo investimentu liuliu iha setór pekuária. Tanba ho investimentu sira-ne’e sei benefisia munisípiu Viqueque no loke kampu traballu,” nia akresenta.
Notísia relevante : MAE agradese abitante Caraubalu oferese rai hodi konstrui edifísiu administrasaun Viqueque
Governu iha kompromisu hakarak halo investimentu iha área pekuária, maibé atu sai indústria tenke iha númeru animál boot.
“Atu atinje planu investimentu sira-ne’e, ita presiza rai maka foin implementa. Tanba ne’e, iha oportunidade ne’e, ha’u agradese ba abitante, autoridade no veteranu sira-ne’ebé iha ona inisiativa di’ak hodi oferese rai ba Governu,” nia tenik.
Iha fatin hanesan, Xefe suku Uma-Ki’ik, Claudino Amaral, haktuir, Autoridade sei koopera ho Governu hodi halo investimentu nune’e bele fó bens-estar ba abitante.
“Ha’u sente investimentu iha setór pekuária ne’e importante tanba bele loke kampu serbisu ba joven sira. Abitante sira oferese ona rai ba Governu, nune’e ba oin tenke haree ba ninia kontinuasaun,” nia tenik.
Nune’e mós, Reprezentante rai-na’in hosi aldeia Rai Hun, Angelo Pereira Amaral, hateten, inisiativa oferese rai ba SEP tanba atu halo investimentu, nune’e joven sira bele asesu ba serbisu.
“Ami fó rai ba Governu ne’e ho laran, maibé ami fó ona ne’e tenke halo buat ruma. Labele ami fó tiha la halo buat ruma. Ida-ne’e ami sente laduun di’ak,” Angelo Pereira, hameno.
Rai ne’ebé komunidade oferese ne’e daudaun abandona no sei laiha ema ruma maka impede investimentu, karik mosu kondisaun ne’e, família sira sei tuur hamutuk hodi ko’alia atu rezolve.
“Ha’u fiar katak impedementu sei laiha. Kuandu iha, ami família sei halai hamutuk ho Autoridade hodi rezolve, maibé ha’u fiar sei laiha inpedementu ba rai ne’ebé ami fó ona ba Governu,” nia hato’o.
Atividade oferese rai ne’e hetan partisipasaun husi Sekretariadu Asuntu Sosiál munisipál Viqueque, Servisu Terra no Propriadade, Servisu Agrikultura, Autoridade lokál, veteranu inklui ekipa SEP.
Jornalista : Vitorino Lopes da Costa
Editora : Julia Chatarina
