COVALIMA, 15 abríl 2024 (TATOLI) –Sekretáriu Estadu Kooperativa, Arsénio Perreira da Silva alerta ba Organizasaun Naun-Governamentál atu fornese Bafo Kay rala hodi implementa iha Programa Merenda Eskolár (PME) ba estabelesimentu ensinu sira.
“Ha’u-nia mandatu seidauk to’o tinan ida maibé hahú husi tinan kotuk mai foin kolleta Bafo Kay rala tonelada 50 atu transforma ba foos seidauk to’o tonelada 30 hanesan prepara ba fini de’it,” Governante, Arsénio Pereira da Silva, dehan, iha resintu AMC, ohin.
Governante ne’e salienta, Covalima iha potensiál kuda Bafo Kay rala iha rai ektare 200 daudaun ne’e atu kolleta ektare 28 no atu kuda ektare ida no polítika Sekoop kuda Bafo Kay rala, iha territóriu ektare 710, maibé identifika ona rai kuaze ektare 1000.
Bafo Kay rala sai hanesan menu ida bele sufisiente atu fornese ba PME, maibé iha Covalima atu reponde ba eskola hira depende ba produsaun nia kuantidade hira, nune’e bele haree kada alunu han ho grama hira foin bele hatene. Tanba ne’e, nia seidauk bele fó sai dadus produsaun Bafo Kay rala iha Covalima hira.
Tuir dadus iha territóriu foin kolleta tonelada 50 nune’e bainhira dulas ba foos seidauk bele to’o tonelada ida.
“Ha’u enkoraja ba agrikultór sira atu kuda Bafo Kay rala nune’e bele fornese ba programa Merenda eskolar, ho nune’e Sekoop mós halo promosaun no enkoraja agrikultór atu kuda batar Kay rala alende ne’e serbisu hamutuk Ministériu Agrikultura, Peska, Pekuária no Floresta (MAPPF) atu fó asisténsia bele prodús Bafo Kay Rala,” nia dehan.
Xefe Departamentu Jestaun Programa Edukasaun, Gregório Ferreira Afonso, reforsa, atu implementa Programa Merenda eskolár iha tinan 2024 ne’e, Servisu edukasaun Covalima sei koordena ho Organizasaun Noun-Governamentál (ONG) Mokatil atu ko’alia kona-ba kuantidade produsaun Bafo Kay rala atu bele fornese ona ba eskola ida .
“Ita implementa progama Merenda Eskolár hakarak uza produtu lokál maibé depende ita-nia estoke sufisiente atu fornese ba estudante atu han to’o tinan ida ka la’e ida-ne’e mak sai problema uitoan,” nia dehan.
Implementa programa merenda eskolár ba estudante nivél hahú pre-eskolár ho ensinu báziku ho nia orsamentu hamutuk $ 17,804 ne’ebé gasta osan ba programa Merenda eskolár tinan ida iha Covalima gasta osan hamutuk $ 1.016 964,48.
Jornalita: Celestina Teles
Editór: Rafael Ximenes de A. Belo
