BAUCAU, 15 abríl 2024 (TATOLI) – Autoridade Administrasaun Munisipál no autoridade lokál prontu kolabora ho kompañia bainhira halo peskiza minerál iha munisípiu Baucau.
Prezidente Autoridade Munisípiu (PAM) Baucau, Veneranda Eurico Marques Lemos Martins, husu komunidade hotu iha Baucau liuliu autoridade suku alvu sira atu koopera ho kompañia durante halo atividade peskiza nune’e bele atinji mehi dezenvolvimentu iha futuru.
“Kamada sosiál tomak ita fó ita-nia apresiasaun ba ekipa matenek-na’in ne’ebé bele halo estudu ba ita-nia rikusoin,” Prezidente Autoridade Munisipál Baucau hateten, iha Sentru Konvensaun Baucau (CCB, sigla Portugés), Vila antiga, segunda ne’e.
Tuir planu, peskiza referida sei hahú iha aban, loron-tersa, 15 abríl no iha área sira hanesan postu Baguia hamutuk suku rua; Defauasi no Saemeta, postu Laga iha bloku minerál neen, iha Vemase bloku minerál hitu no Venilale iha Suku haat.
Attividade peskiza rikusoin refere sei hala’o husi kompañia internasionál husi nasaun Austrália hanesan Iron Fortune no Beacon Mineral Limited ho durasaun tinan-haat iha área postu administrativu Venilale, Baguia, Vemase ho Laga.
Autoridade Suku Fatulia Postu Administrativu Venilale, Angelino Moises Pereira, hateten, sei apela ba komunidade hotu iha Suku Fatulia atu koopera ho parte kompañia bainhira halo peskiza too rezultadu finál.
Tanba ne’e hanesan autoridade suku prontu koopera nunee bele hetan rezultadu halo explorasaun no iha benefísiu ba nasaun no povu Timor-Leste tomak.
“Prontu koopera tanba peskiza ida-ne’e bele detekta rikusoin minerál, bainhira halo esplorasaun fó benefisiu ba povu,” Angelino Pereira argumenta.
Autoridade suku Fatulia hato’o agradese ba inisiativa governu ne’ebé kontrata kompañia internasionál atu halo peskiza rikusoin iha munisípiu Baucau inklui mos suku balun husi Postu Venilale.
Entretantu, Governu liuhusi Ministériu Petróleo no Minerál (MPM) hamutuk ho Autoridade Munisipál ohin realiza seremónia atribusaun lisensa prospesaun no peskiza minerál metaliku ba kompañia nune’e halo estudu ba fatin minerál metaliku iha área ne’ebé identifikada ona
Jornalista : Natalino Belo
Editór : Rafael Ximenes de A. Belo
