COVALIMA, 15 Abríl 2024 (TATOLI) – Diresaun Transporte Komunikasaun (DTC, sigla portugés) Covalima arrekada, entre Janeiru no Marsu, reseita $24.495 ba kofre Estadu ne’ebé mai husi inspesaun ba motorizada no kareta, renovasaun karta kondusaun no seluk tan.
Diretór Transporte no Komunikasaun, Joaquim Gusmão, informa katak inspesaun no renovasaun ba dokumentu sira ho totál invoice hamutuk 1.712 ne’ebé koverte ba osan $24.495 – ne’ebé iha Janeiru rekolla $11.480, Fevereiru $6.707,50 no Marsu $6.307,50.
Joaquim Gusmão husu ba sidadaun-sira ne’ebé nia dokumentu mate tenke bá trata iha Diresaun Transporte no Komunikasaun, nune’e bele livre halo movimentu bainhira polísia tránzitu halo pasa revista.
“Sidadaun ne’ebé mak lakohi renova nia dokumentu, bainhira polísia-sira halo pasa revista dokumentu mak mate nafatin aplika koima”, nia realsa.
Rekorde katak, iha 2023, DTC Covalima kontribui ona reseita $ 76.322,50 ba konfre Estadu.
Motorista Mario da Cruz hateten nu’udar sidadaun tenke renova dokumetu nune’e polísia tránzitu halo pasa revista bele livre halo movimentasaun. “ Ita nu’udar sidadaun iha obrigasaun atu renova dokumentu bainhira mate. [Bainhira la renova] ita hafutu malu de’it ho polísia tránzitu, tanba ita ta’uk polísia halo apreensaun ba motorizada”, nia realsa.
Jornalita: Celestina Teles
Editora: Maria Auxiliadora
