DILI, 15 abríl 2024 (TATOLI) – Sekretariu Jerál Federasaun Karate-do Timor-Leste (FKTL), António Carlos de Araujo, hateten, preparadu ona hodi realiza Xanana Cup ba dala-neen ne’ebé sei hala’o iha fulan-maiu iha Jináziu Dili.
“Federasaun tinan-ne’e sei realiza Xanana Cup ba dala-neen, ita planu atu hala’o iha fulan-maiu nia laran. Ita koordena ona ho Ministériu Juventude Desportu Arte no Kultura (MJDAK) ne’ebé kompetisaun ita sei realiza duni, loron mak ami seidauk fó sai tanba hein despaisu husi MJDAK mai mak ami fó sai, tanba ita sei utiliza Jináziu Dili,” Sekretariu Jerál ne’e hatete ba Agência TATOLI iha Jináziu Dili, segunda ne’e.
Jogu ne’e sei kompete entre atleta sira husi Munisípiu inklui Dili no kada Munisípiu ida sei reprezenta atleta na’in 10; feto lima no mane lima; tuir ida-idak nia klase.
“Dokumentu ba jogu nian ami manda hotu ona ba Assosiasaun Munisípiu sira. Rejistu ba atleta sira hahú 10-15 maiu ho target (alvu) ne’ebé iha Munisípiu ida ema na’in 10 atleta hamutuk 100-resin mak sei kompete,” nia informa.
Orsamentu ne’ebé utiliza ba realiza eventu ne’e apoiu husi Komisaun Reguladora Arte Marsiál (KRAM) ne’ebé aprova iha tinan 2023 maibé la konsege realiza tinan-ne’e foin mak realiza ho montante rihun $17-resin.
“Ita haree orsamentu ne’e limitadu ita tenke gasta ba buat barak ba preparasaun nian no buat seluk tan. Maibé ita mós prepara osan uitoan ba manán na’in sira primeiru lugar ita sei fó $200, sertifikadu no medalla, segundu lugar $150, sertifikadu no medalla, terseiru lugar $100, sertifikadu no medalla. Osan ne’e la sufisiente entaun komisaun so fasilita de’it osan transporte ba ekipa hosi Munisipiu” nia katak.
Jogu ne’e hanesan meiu ida ba FKTL hodi buka fini atleta ba selesaun nasionál.
“Iha jogu ne’e ita hodi identifika sira ne’ebé mak iha prestasaun di’ak ita bele hili ba selesaun nasionál hodi halo preparasaun ba eventu internasionál sira,” nia konklui.
Jornalista: Hortencio Sanchez
Editór: Rafael Ximenes de A. Belo
