DILI, 15 abríl 2024 (TATOLI) – Ministru Interiór Francisco da Costa Guterres, dehan Ministériu Interiór, daudaun ne’e, prepara hela diploma autorizasaun ba rekrutamentu membru foun Polísia Nasionál Timor-Leste (PNTL).
“Kona-ba rekrutamentu ba membru PNTL foun ne’e agora tama ona ba faze diskusaun diploma entre Ministériu Interiór no Komandu Jerál PNTL. Diploma ne’ebé agora iha hela faze diskusaun ne’e nu’udar diploma ida ne’ebé hanaran diploma autorizasaun. Liuhosi diploma ne’e Ministru Interiór husu autorizasaun ba Konsellu Ministru para Ministru Interiór bele halo rekrutamentu ba membru PNTL foun”, Francisco da Costa hateten ba jornalista iha serimónia entrega ró patrollamentu rua ba UPM iha Kuartél UPM Sionál Dili, segunda ne’e.
Nia garante, diploma ida-ne’e, Ministériu Interiór sei finaliza nia deskusaun iha semana ida-ne’e nia-laran.
“Diploma legál ida-ne’e ita sei konklui iha semana ida-ne’e nia-laran no semana oin ha’u sei lori ba aprezenta iha Konsellu Ministru hodi husu aprovasaun hafoin ba halo rekrutamentu membru PNTL foun”, nia dehan.
Governante ne’e esplika, prosesu rekrutamentu ba membru foun PNTL tinan ne’e, sei lao ho rigór tanba sei monitoriza direta hosi internasionál.
“Kona-ba membru PNTL hira mak ita sei rekruta iha tinan ne’e ho orsamentu hira inklui kríteriu sira ami sei haree hodi tau iha diploma legál ne’e. Maibe atu dehan de’it katak prosesu rekrutamentu ne’e sei monitoriza hosi ema internasionál”, nia adianta.
Nia dehan, kritériu ba rekrutamentu membru foun PNTL mak sidadaun ida kuandu envolve aan iha Grupu Arte Marsiál no Grupu Arte Rituál tenke denunsia aan antes hodi haketak hosi GAM no GAR ho objetivu atu servi de’it ba instituisaun PNTL. Tanba servisu PNTL ne’e nu’udar kna’ar profisionál.
Jornalista: Natalino Costa
Editór : Zezito Silva
