Autoridade nafatin husu governu kontinua konstrusaun estrada iha área Caisido

BAUCAU, 16 abríl 2024 (TATOLI) – Kondisaun grave, Autoridade lokál husu governu kontinua prosesu konstrusaun estrada iha área Caisido, suku Tirilolo, Postu administrativu Baucau Vila.

Xefe suku Tirilolo, Elvino Freitas Belo, esplika, estrada iha aldeia haat hanesan Osso-ua, Parlamentu, Lialailesso no Caisido kategória nu’udar área rurál ne’ebé atualmente kondisaun grave tanba to’o agora seidauk iha serteza atu kontinuasaun tanba antes ne’e paradu mezmu pakote dahuluk finaliza ona iha tinan-2017.

“Ne’e presiza atu hadi’a. Tenke hadi’a tanba komunidade Aldeia haat inklui suku Caibada asesu hotu. Maibe, agora daudaun ita haree estrada kondisaun la di’ak,” Xefe suku Tirilolo, hateten, iha aldeia Lialailesso, tersa ne’e.

Estrada referida totál besik kilometru 30 ne’ebé kompañia JOVA Construction mak responsabiliza no fahe ba pakote tolu nune’e pakote dahuluk finaliza ona no hela pakote rua ho totál kilometru 10-resin mak to’o agora seidauk iha serteza atu kontinua nune’e difikulta movimentu transporte tantu privadu no públiku.

Nune’e mós difikulta movimentasaun populasaun  nian atu asesu ba merkadu, serbisu no estudante sira tuir atividade aprendizajen iha eskola, liliu ensinu báziku terseiru siklu no sekundáriu sira ne’ebé kuaze lokaliza iha vila laran tanba distánsia dook no kondisaun Estrada ne’e rasik sei nafatin grave.

Autoridade suku Tirilolo hamutuk ho komunidade kontinua husu atu governu fó atensaun ba estrada referida, nunee komunidade bele lori sai produtu lokál ba iha merkadu.

“Ne’e tama iha Ministeiru Obra Públiku nian. Sira mai haree ona, atu aselera prosesu depende iha governu, ami prontu kopera,” Elvino Belo akresenta.

Ho realidade Estrada ne’e, komunidade Tereza da Costa sente triste, tanba iha tempu okupasaun no invazaun Timor-Leste ukun aan liu tinan-20, kondisaun estrada iha Caisido, suku Tirilolo kontinua iha kondisaun aat no sai preokupasaun ba ema hotu husi área referida.

“Ita haree de’it, husi aeroportu Lanud tuun mai kondisaun aat, husi Vila Antiga ba Caibada mós konsidera kondisaun aat, ne’e governu tenke hanoin,” nia argumenta.

Entretantu, Suku Tirilolo hamutuk aldeia ne’en, aldeia rua kategória urbana hanesan Betulale no Lutumutu no aldeia haat hanesan Caisido, Parlamentu, Lialailesso no Osso-ua nu’udar área rurál ho totál populasaun hamutuk rihun 9.789.

Jornalista   : Natalino Belo 

Editór         : Rafael Ximenes de A. Belo