Livru Matadalan Jornalizmu Inkluzivu sei tulun serbisu jornalista sira
DILI, 16 Abríl 2024 (TATOLI) – Konsellu Imprensa (KI) no Australian Broadcasting Coorporation International Development (ABCID) lansa livru Matadalan Jornalizmu Inkluzivu hodi tulun jornalista no redasaun sira kona-ba oinsá atu hakerek no halo edisaun ba notísia ho di’ak molok halo publikasaun.
Prezidente KI, Otélio Ote, hateten objetivu husi lansamentu ba matadalan ne’e mak atu fasilita serbisu redasaun, editór no jornalista sira, atu iha kapasidade téknika, profisionál no intelektuál oinsá bele hakerek notísia no edita ho di’ak.
Otélio Ote esplika katak livru ne’e mós sei ajuda jornalista sira hodi hasa’e sira-nia koñesimentu oinsá belefahe informasaun ne’ebé importante ba atividade hotu ne’ebé povu no komunidade sira halo, inklui ema ho defisiénsia (EhD) no komunidade Lésbika, Gay, Biseksuál no Transjéneru (LBGT) sira, nune’e bainhira jornalista ida hakerek notísia kona-ba asuntu sira ne’e bele hakerek terminolojia ho loloos atu labele halo diskriminasaun ba EhD iha Timor -Leste.
“Husu ba jornalista hotu inklui editór sira atu lee livru Matadalan Jornalizmu Inkluzivu ne’e atu serbisu redasaun bele iha kapasidade tékniku profisionál no intelektuál bainhira hakerek notísia no halo edisun ho di’ak molok halo publikasaun, nune’e bele evita diskriminasaun”, Otélio Ote hateten ba jornalista sira iha Timor-Plaza, ohin.
Livru matadalan ne’e sei hasa’e mós koñesimentu baze oinsá bele fó importánsia ba jornalista iha serbisu kobertura sira iha aspetu hotu tantu husi parte Estadu, sosiedade sivíl, relijiozu, problema sosiál, inklui EhD no LGBTI hodi prevene diskriminasaun iha publikasaun notísia sira.
Iha fatin hanesan, Diretór ABCID, Aaron Kearney, agradese ba KI tanba ho kolaborasaun di’ak bele prodús ona livru Matadalan Jornalizmu Inkluzivu ne’ebé ho objetivu atu dezenvolve di’ak liután mídia iha Timor-Leste.
“Livru Matadalan Jornalizmu Inkluzivu ho tópiku Mai Ita Rekoñese no Selebra Diversidade ne’e importante tebes atu fasilita jornalista sira bele hakerek notísia investigativu ho kle’an no inkluziva’’, nia konklui.
ABCID iha interese atu serbisu hamutuk ho KI hodi dezenvolve mídia iha país, liuhusi apoiu asisténsia téknika ba formasaun hodi kapasita jornalista timoroan.
Jornalista: Tomé Amado
Editora: Maria Auxiliadora
