DILI, 16 abríl 2024 (TATOLI) – Ministru Defeza (MD) Kontra Almirante, Donaciano Costa Gomes “Pedro Klamar Fuik”, hateten, koopera di’ak ona ho Ministériu Interiór (MI) hodi garante seguransa ne’ebé másimu durante vizita Sua Santidade Papa Francisco iha fulan-setembru mai ne’e.
“Ministériu relevante hotu tantu Ministériu Defeza, Ministériu Interiór hamutuk ho Polísia Nasionál Timor-Leste (PNTL), Falintil-Forsa Defeza Timor-Leste (F-FDTL) iha ona koordenasaun di’ak hodi fó seguransa másimu ba ita-nia Amu Papa ne’ebé sei mai vizita Timor-Leste iha setembru agora,” Ministru Donaciano hateten perante profisionál komunikasaun sosiál sira, iha Palásiu Prezidensiál Bairru-Pite Dili, tersa ne’e.
Governante ne’e dehan, preparasaun ne’ebé mak F-FDTL ho PNTL halo di’ak tebes hodi asegura Papa durante vizita tuir saida mak povu hein hela.
Tuir nia, vizita Papa nia importante tebes tanba povu Timor-Leste hotu preparadu hodi hein, depois tinan 35 vizita Papa João Paulo II.
Tuir rute ne’ebé iha Papa hala’o nia vizita uluk mai Indonézia liu ba Papua Nova Guine, liu mai Timor-Leste loron tolu hafoin liu fali ba Singapura ikus liu fila hikas ba Vatikanu.
Daudaun ne’e, Estadu Timor-Leste halo preparasaun másimu tebes tanba iha fulan-fevereiru liubá Governu aprova ona orsamentu hamutuk millaun $12 hodi halo preparasaun.
Iha preparasaun ne’e hanesan hadi’a estrada sira iha kapitál Dili, re-abilita igreja Katedrál Dili, re-abilita Uma Adat Tasi-Tolu no seluktan.
Jornalista: Hortencio Sanchez
Editór: Rafael Ximenes de A. Belo
