BAUCAU, 16 abríl 2024 (TATOLI) – Autoridade suku ofisialmente intrega Uma Naroman ba Povu (UNP) ba benefisiáriu hamutuk na’in-sia iha suku Tirilolo, Postu administrativu Baucau Vila.
Reprezentante Serbisu Munisipál Programa Nasionál Dezenvolvimentu Suku (PNDS) Baucau, Eugenia Cardoso, esplika, UNP hirak-ne’e konstrui iha faze daruak liuhusi Orsamentu Jerál Estadu (OJE) tinan-2022 ne’ebé liuhusi faze identifika hosi ekipa verifikadór sira iha nível suku hodi hili benefisiáriu uma-kain hamutuk sia kompostu hosi aldeia Caisido hamutuk xefi familia tolu, Lialailesso tolu no Lutumutu tolu.
“Ohin ita entrega uma sia ba ita-nia benefisiáriu sira tuir relatóriu servisu hahú tinan-2022,” Eugenia Cardoso hateten iha Lialailesso, tersa ne’e.
Tuir polítika VIII governu konstitsuionál liuhusi PNDS Ministériu Administrasaun Estatál (MAE) implementa programa referidu tanba hakarak tulun família kbiit laek sira.
Nune’e husu benefisiáriu hotu ne’ebé hetan ona subsídiu UNP husi governu presiza kuida nune’e bele dura to’o tinan naruk, tanba bainhira uma UNP sei laiha alokasaun orsamentu hodi halo manutensaun inklui reabilitasaun.
“Iha ema barak seidauk iha oportunidade atu hetan ajudu maibé sira iha ona oportunidade tenke kuidadu, liuliu manutensaun,” Cardoso akresenta.
Xefe Suku Tirilolo, Elvino Freitas Belo, apresia Governu tanba ajuda hodi aloka orsamentu ba komunidade kbiit laek sira atu konstrui uma inklui kompleta ekipamentu uma-laran hanesan kulsaun, kama, armáriu, meza, kadeira, inklui sasan koziña nian.
“Hau husu benefisiáriu sira tenki kuidadu uma sira-ne’e tanba orsamentu husi governu entaun tenke asegura sasan sira-ne’e,” Elvino Belo rekomenda.
Iha fatin hanesan, Benefisiáriu Joana dos Santos Belo, hateten, antes hetan ajudu, família referida hela iha uma ho kondisaun aat, tanba taka ho tali-tahan inklui didin ho bebak, nune’e iha tempu udan kondisaun uma la seguru atu hela.
Nune’e nu’udar benefisiáriu hato’o agradese ba governu tanba konstrusaun uma foun ho naran Uma Naroman ba Povu iha kualidade no garante uza ba tinan barak.
“Governu fo ona uma mai ami prontu tiha ona, ami sei hela ho kontente, tanba ami-nia uma antes ne’e ladiak,” Joana Belo hateten.
Suku Tirilolo liuhusi PNDS iha tinan-2022 hetan alokasaun orsamentu hamutuk $153,306.00 hodi implementa UNP faze daruak ne’ebé kada uma hetan orsamentu hamutuk $17,034.00 ho kategória medida uma 6×9 m² kompostu hosi kuartu tolu, sala vizita ida, sintina inklui dapur.
Hosi benefisiáriu na’in-sia kompostu hosi João da Silva, José Mesquita, Venancio da Costa, Joana dos Santos Belo, Paulino José de Assis, Hermenezildo da Silva, Hermenezilda Ona-Ko’o, Julio Belo inklui Tereza da Costa.
Jornalista : Natalino Belo
Editór : Rafael Ximenes de A. Belo
