AILEU, 16 Abríl 2024(TATOLI)-Xefe Suku Seloi Kra’ik, postu administrativu Aileu-Villa, munisípiu Aileu, Silvestre Monteiro, preokupa ho kondisaun estrada hosi aréa Lakbou hodi liga ba suku Seloi Krai’ik no Railaco munisípiu Ermera, tanba kondisaun aat hodi difikulta komunidade sira atu lori sira-nia produtu lokál asesu bá merkadu.
Lideransa komunitária ne’e relata katak estrada liga husi aldeia Fatumane, Hlalamera no Tabulasi, no fronteira entre suku Seloi Kra’ik ho postu administrativu Railaco, munisípiu Ermera daudaun ne’e kondisaun grave.
“Sira (komunidade) difísil halo movimentu mai suku tanba estrada Raimean no iha tempu udan kondisaun estrada aumenta aat liután. Ida ne’e difikulta sira atu lori sira-nia produtu bá faan iha merkadu Aileu-Villa nomós bá merkadu Gleno iha munisípiu Ermera,” Silvestre Monteiro informa ba TATOLI iha Seloi Kra’ik, tersa.
Nia dehan, iha tinan 2019 governu kontrata ona Kompañia Chaviq. Unip Lda, hodi konstrui estrada haleu sítiu turístiku, Lagoa Seloi Kra’ik, ho distansia killo-metru neen no Kompañia LNG mós konstrui killo-metru rua, maibé to’o agora seidauk remata.
“Sira (komapañia responsável) halo servisu ne’e tinan lima (5) maibé, to’o agora seidauk finaliza. Komunidade halo protesta hasoru kompañia tanba tarde finaliza projetu ne’e no ami líder komunitária mós hato’o ona karta ba servisu obra públika munisipál nomós ba Prezidente Autoridade Munisipál maibé seidauk iha resposta,” xefe suku nee hateten.
Silvestre Monteiro hateten iha tinan 2021 Kompañia Beskusa Unip. Lda, halo ona levantamentu dadus husi Seloi Kra’ik bá to’o aldeia Kokoa postu administrativu Railaco maibé to’o agora projetu ne’e seiduk implementa.
“Kompañia ne’e mai foti ona dadus besik dala haat (4) maibé to’o agora ami seidauk rona ninia rezultadu,” nia hateten.
Autoridade lokál ne’e promete iha tempu badak sei koordena ho Xefe Suku Samalete no Xefe Suku Railaco Leten, Postu Administrativu Railaco, munisípiu Ermera hodi prepara proposta konjunta atu nune’e bele aprezenta ba autoridade munisipál hodi tau iha planu asaun anuál 2025.
Suku Seloi Kra’ik iha aldeia 10 ho totál populasaun 4.275, komunidade iha suku ne’e maioria moris ho vida agrikultór.
Jornalista : Afonso do Rosário
Editór : Agapito dos Santos
