VIQUEQUE, 17 abríl 2024 (TATOLI)—Udan-boot ne’ebé akontese iha fatin balun iha territóriu, rezulta mota Welolo, iha suku Luca, postu administrativu Viqueque Vila, munisípiu Viqueque, sa’e hodi estraga abitante nia infraestrutura bázika.
“Daudaun akontese dezastre inundasaun, mota Welolo sobu estraga abitante sira-nia uma, bee afeta ba eskola Pré-Eskolar no Ensinu Báziku Sentrál (EBC, sigla portugés) foin lalais ne’e no kontinua estraga abitante sira-nia to’os no natar inklui uma. Ho dezastre ida-ne’e, Governu presiza tau atensaun sedu atu mota labele prejudika beibeik movimentu,” Xefe aldeia Uma-boot, suku Luca, Jermias Marque, informa ba Agência Tatoli, kuarta ne’e.
Ho kondisaun ne’e, Autoridade Protesaun Sivíl (APC, sigla portugés) liuhusi ekipa Gabinete Relasaun Externa no Komunikasaun, Care Internasionál no Fundasaun K’nua Haberan Komunidade kontinua halo observasaun kondisaun hafoin dezastre naturál iha mota Welolo.
Nia konta, dezastre naturál ne’ebé akontese iha mota Welolo hahú loron 05 marsu to’o 05 abríl 2024, konsege afeta ba uma hamutuk 65, ne’ebé uma 14 estraga totál.
Notísia relevante : Abitante iha suku Luca Viqueque hala’o serimónia kulturál ba mota Welolo
Família afetadu aprezenta ona ba Komisaun Jestaun Dezastre suku Luca iha loron 08 abríl 2024 hodi kontinua relata iha nível postu no munisípiu.
Nune’e, Autoridade lokál sujere ba ministériu relevante sira hanesan Protesaun Sivíl, Ministériu Obra Públika (MOP), Ministériu Edukasaun (ME), Ministériu Administrasaun Estatál (MAE), Ministériu Agrikultura Floresta, Pekuária no Peska (MAFPP) hodi tun direta haree abitante sira-nia sofrimentu ne’ebé durante ne’e enfrenta hodi buka solusaun iha tempu badak.
Tanba ne’e, nia relata, mota Welolo daudaun ne’e kontinua estraga abitante sira-nia uma, Eskola Pré-Eskolár no EBC 05 Welolo, to’os, no natar. Inundasaun ne’e mós difikulta mós abitante sira-nia movimentu husi Diresaun Viqueque bá Natarbora tanba ponte Welolo sobu iha tinan kotuk.
Iha fatin ketak, Diretór Organizasaun Fundasaun K’nua Haberan Komunidade, Agosto Pinto, hateten, ekipa konjunta halo programa asaun antisipatóriu dezastre hodi identifika Sentru Evakuasaun ba vítima afetadu sira.
“Ohin ami ba ko’alia ho vítima afetadu sira no identifika ona Sentru Evakuasuan provizóriu ida ba ita-nia abitante sira, karik intensidade bee sa’e maka’as liután, ita lori sira ba fatin evakuasaun ne’ebé iha duni aldeia Uma Boot ne’ebé dook husi bee. Kondisaun agora iha Welolo ita haree vítima sira-ne’e terus liu ona no Governu halo intervensaun ba mota Welolo tempu udan afeta beibeik ba abitante sira-nia hela fatin,” nia hato’o.
Jornalista : Vitorino Lopes da Costa
Editora : Julia Chatarina
