iklan

POLÍTIKA

PN esplika alterasaun lei KAK ba Xefe Estadu

PN esplika alterasaun lei KAK ba Xefe Estadu

Prezidente Repúblika, Jose Ramos-Horta enkontru Prezidente PN, Fernanda Lay. iha Palásiu Prezidensiál, Bairru-Pité, kuarta (17/04). Imajen Tatoli/Egas Cristóvão

DILI, 17 abríl 2024 (TATOLI) – Prezidente Parlamentu Nasionál (PPN), Maria Fernanda Lay hasoru malu ho Prezidente Repúblika José Ramos Horta hodi esplika kona-ba alterasaun lei Komisaun Anti Korupsaun (KAK) nune’e Xefe Estadu bele iha koñesimentu kle’an antes halo promulgasaun.

“Ha’u mai hasoru Prezidente Repúblika atu esplika kona-ba Parlamentu Nasionál halo alterasaun ba Lei KAK atu bele iha segementu nune’e bele hili komisáriu KAK foun. Tanba buka konsensu la hetan dalan seluk mak alterasaun,” Fernanda Lay hatete ba jornalista sira iha Palásiu Prezidensiál Bairru-Pite Dili, kuarta ne’e.

Nia esplika, liga ho alterasaun ne’e atu hase’e mós kompeténsia KAK nian ne’ebé iha, iha artigu ida labele interpreta artigu ho singulár no tenke liga ho artigu seluk ne’ebé própriu ho lei.

“Ita halo alterasaun ba lei rua de’it artigu rua ne’e iha problema boot ne’ebé ita tenke iha konsensu atu hili Komisáriu KAK ho deputadu 49 maibé agora ita altera ona la presiza to’o iha ne’ebá. Entaun, deputadu maioria simplis iha plenária ho deputadu 33 bele halo votasaun ba Komisáriu KAK,” nia hatete.

Rekorda fali katak, Parlamentu Nasionál, foin lalais ne’e, liuhusi plenária extraordináriu aprova pedidu urjénsia husi Governu ba diskute alterasaun daruak husi lei númeru 8/2009, loron 15 jullu, Komisaun KAK.

Durante votasaun hosi deputadu sira rezultadu hatudu a-favór 37, kontra no abstensaun 0, ne’ebé pedidu urjénsia pasa iha Parlamentu Nasionál.

Ho aprovasaun pedidu ne’e, prosesu tuir mai sei trata ho karáter urjénsia ba alterasaun lei ne’e, nune’e komisaun A sei kontinua diskusaun ba materia alterasaun lei KAK, ne’ebé sei konvida entidade relevante hodi halo audénsia públika hafoin fó relatóriu paresér no diskute iha plenaria faze jeneralidade no kontinua iha espesialidade.

Enkuantu, Agência TATOLI sita tuir Rejimentu Parlamentu Nasionál (RPN) artigu 97.0 (Prosesu urjente), husi alínea 1 to’o 4, hateten ba kualker projetu ka proposta-lei ka rezolusaun bele uza prosesu urjente.

No inisiativa ba prosesu urjente kompete ba Deputadu sira, ba bankada parlamentár ka ba Governu, no pedidu ba urjénsia ne’e haruka ba komisaun kompetente, ne’ebé sei apresia iha prazu oras 24 nia laran, no tenke elabora paréser fundamentadu no paréser ne’e elabora tiha plenáriu sei delibera kona-ba urjénsia no debate.

Rejimentu Parlamentu Nasionál (RPN) artigu 106.º (Prazu mínimu molok debate iha jeneralidade), projetu ka proposta-lei labele debate iha jeneralidade molok liu prazu loron hitu, sura hahú husi data admisaun, la taka dalan ba buat ne’ebé hakerek iha artigu 97.

Nune’e, Prezidente PN, Maria Fernanda Lay, konsidera paresér komisaun nian klaru tebes, hanesan ema hotu hatene komisáriu KAK laiha kuaze tinan ida resin-ona ne’ebé ita tenke rezolve ona.

Tanba Parlamentu Nasionál halo ona aprovasaun ba alterasaun lei ne’e iha faze jeneralidade, iha semana oin sei tama ba espesialidade no termina iha finál globál sei submete kedan ba Prezidente Repúblika haree halo promulgasaun.

Jornalista: Hortencio Sanchez

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!