iklan

BAUCAU

Reparasaun estrada iha Baucau vila apoia husi emprezáriu lokál

Reparasaun estrada iha Baucau vila apoia husi emprezáriu lokál

BAUCAU, 17 abríl 2024 (TATOLI) – Reparasaun estrada iha Baucau Vila ne’ebé taka ho rai-mutin ba estrada ku’ak sira husi Vila Antiga to’o Vila Nova, apoia hosi emprezáriu lokál hodi prepara ba selebrasaun loron fundasaun Baucau ba dala-165.

Prezidente Autoridade Munisipiu (PAM) Baucau, Veneranda Eurico Marques Lemos Martins, esplika, liuhusi sorumutu entre autoridade administrasaun ho Kámara Komérsiu Indústria Timor-Leste (CCI-TL) munisípiu Baucau rezulta kompañia rua mak voluntariamente apoia taka estrada ku’ak iha Baucau vila hanesan Samaula no Cuba.

“Sira la’ós lahetan autorizasaun, sira mai hateten katak hakarak taka rai iha estrada sira ne’ebé kuak, tanba loron-20 abríl nu’udar fundasaun Baucau nian. Ha’u labele dehan labele, se hakarak kontribui ho voluntáriu avontade,” Prezidente Autoridade Munisipál Baucau hateten iha Vila nova, kuarta ne’e.

Mezmu empreza rua referida taka estrada husi diresaun Nagardjo to’o rotunda Vila nova no kontinua husi Vila nova to’o vila antiga ne’ebé públiku kestiona iha rede sosiál tanba hamosu tahu no rai-rahun.

Nune’e Veneranda Lemos, konsidera, públiku ne’ebé kestiona ba asaun kontribusaun hosi empreza sira ho voluntáriu ne’e, laiha konsiénsia tanba hatene krítika no halo insultu de’it maibé la haree ba ema-nia inisiativa no vontade.

“Ita laiha ona fuan haree ema nia inisiativa di’ak no morál ba hadi’a sasan ne’e, ita haree fali mak rezultadu udan ne’e nian, ha’u sente triste, mas ha’u louva ba emprezáriu ne’ebé mak ho laran di’ak tebes ajuda taka netik ku’ak,” Veneranda Lemos akresenta.

Veneranda Lemos, husu Baucau-oan hotu tenki hanoin konstrutiva hodi apoia prosesu dezenvolvimentu iha Munisípiu Baucau, tanba Baucau oan hotu nia responsabilidade.

Entretantu, iha loron hirak ba kotuk, públiku kestiona iha rede sosiál hanesan Facebook tanba kondisaun Estrada ne’ebé aat taka fali ho rai-mutin iha asfaltu leten ne’ebé mak ku’ak ho rai-mutin hodi hamosu tahu no rai-rahun.

Jornalista   : Natalino Belo 

Editór         : Rafael Ximenes de A. Belo

iklan
iklan

Leave a Reply

iklan
error: Content is protected !!