DILI, 17 abríl 2024 (TATOLI)–Timor-Leste sei asina planu asaun ba kooperasaun ekonómika no komersiál tinan 2024-2027 iha fórum Macau, ne’ebé sei hala’o iha loron 22 abríl 2024.
“Liuhosi reuniaun Konsellu Ministru, delibera ona hodi fó podér tomak ba Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, hodi asina dokumentu importante ne’e, iha Macau,” Vise-Ministru Asuntu Parlamentár, Adérito Hugo da Costa, hateten, hafoin reuniaun ezekutivu, iha Palásiu Governu, kuarta ne’e.
Notísia relevante : Forum Internasionál Business la’o ho susesu, Kalbuadi agradese Xanana-Horta
Planu asaun ne’e ninia objetivu atu dinamiza kooperasaun ekonómika no komersiál ne’ebé di’ak liu entre país partisipante fórum Makau nian.
Nune’e, planu asaun ne’e define área kooperasaun ida-ne’e ba nível intergovernamentál no interkámbiu ho organizasaun internasionál sira, komérsiu no investimentu, dezenvolvimentu, setór kulturál no umanístika, plataforma Macau no ba preparasaun konferénsia ministeriál tuir mai.
Jornalista : Antónia Gusmão
Editora : Julia Chatarina
