DILI, 17 abríl 2024 (TATOLI) – Prezidente Repúblika, liuhusi asesoria asuntu Inkluzaun Sosiál ne’ebé lidera husi asesór prinsipál, Gaspar Afonso, kontinua distribui apoiu sosiál hanesan foos, mina ba te’in, kulsaun, pasta no kadernu ba estudante inklui parsela ida ba hahan nian, ba ema ho difisiénsia iha Munisípiu Bobonaro iha Postu administrativu Bobonaro no Postu administrativu Lolotoe.
“Ita distribui iha Munisípiu Bobonaro, iha Suku Teba-bui no Postu administrativu Lolotoe, mai apoiu ita-nia maluk difisiénsia sira. Ida-ne’e, halo sira sente dehan diskriminadu, ita lalori buat barak maibé ho vizita ne’e de’it mós sira sente orgullu tanba estadu ida ne’e la husik sira mesak,” Asesór Afonso hateten liuhosi nota ne’ebé Agência TATOLI asesu husi media Gabinete Prezidente Repúblika, ohin.
Tuir asesór ne’e, nunka vizita sira (Ema ho difisiénsia iha área rurál), no la lori domin ba sira, ne’e sira sente diskriminadu iha sira-nia moris no sente izoladu, tanba barak ne’ebé mai husi família moris vulnerável tebes.
Hanesan ema ne’ebé mak reprezenta ema ho difisiénsia iha Palásiu Preidensiál, Gaspar Afonso haktuir, apoiu sosiál sira ne’ebé durante ne’e distribui, mai husi inisiativa Prezidente Repúblika, Ramos Horta ho objetivu atu lakohi husik ema ida iha kotuk no fó domin ba sira mezmu apoiu ne’e atende de’it iha loron ida ka rua maibé importante mak prezensa iha sira-nia le’et.
Husi atividade sosiál ne’e, atu fanun hikas ema hotu liuliu governante sira atu haree situasaun ema ho difisiénsia iha territóriu nasionál no Xefe Estadu atuál mós fó prioriedade ba asuntu ema ho difisiénsia no direitu umanu, atu promove fraterninade umana.
Nune’e nia husu ba ministériu relevante sira ba asuntu ema ho difisiénsia liga ho dekretu-lei Nú. 8/2024 ne’ebé governu da-IX revoga, atu fó mós prioriedade ba ema ho difisiénsia husi idade 0-17 atu asesu mós ba pensaun seguransa sosiál.
Calisto Ximenes, reprezentante no nu’udár mós matadalan ba rekolla dadus ema ho difisiénsia nian iha área rurál espresa, ‘’Ha’u reprezenta maluk ema ho difisiénsia hato’o ami-nia agradesimentu ba Prezidénsia Repúblika ne’ebé ajuda ona alin difisiénsia sira ne’ebé durante ne’e la hetan apoia sosiál ruma’’.
Entretantu, distribuisaun apoia sosiál ba ema difisiénsia sira iha Munisípiu Bobonaro ho totál benefisiáriu na’in 15 kompostu husi na’in lima mai husi Suku Bugas, iha Postu-Administrativu Bobonaro no na’in-10 mai husi Suku Deudet, Postu administrativu Lolotoe.
Ema ho difisiénsia ne’ebé hetan benefisiáriu, maioria ema ho difisiénsia iha liman, ain, matan no mentál ho idade menus husi 17 hamutuk na’in 12 no idade 30-resin hamutuk na’in tolu.
Jornalista: Hortencio Sanchez
Editór: Rafael Ximenes de A. Belo
