COVALIMA, 18 Abríl 2024 (TATOLI) – Ezekusaun Orsamentu Jerál Estadu (OJE) 2024 iha Covalima atinje ona 20,5%, husi totál millaun $7,3 ne’ebé aloka ba munisípiu ne’e.
Diretora Servisu Finansa Munisípu Covalima, Rosita Freitas, informa regra ezekusaun orsamentál ba kada trimesterál tenke atinje 25% , maibé Covalima foin to’o 20,55, tanba mudansa estrutura ba Prezidente Autoridade Covalima ne’ebé foin simu pose iha Marsu, nune’e fó impaktu ba ezekusaun orsamentu tarde.
“Orsamentu ba Covalima atinje 20,5%, ne’ebé ezekuta ba kategória saláriu no vensimentu $258.378,71, ekivale ba 12,2%, bens no servisu $29.388 ka 4,4%, no transferénsia públika gasta ona $135.420 ka 45,7% ba Programa Merenda Eskolár no saldo atual $7,036.325”, Diretora Finansa informa, ohin.
Responsavel ne’e salienta katak Covalima nia ezekusaun seidauk tuir meta, tanba orsamentu ba kapitál menór $166.820 no kapital dezenvolvimentu $1,350.192 seidauk halo ezekusaun, tanba sei iha prosesu.
Prezidente Autoridade Munisípiu Covalima, Miguel Armada Cardoso, admite katak tanba autoridade munisipál foin simu pose, entaun ezekusaun orsamentu tuun. Tanba ne’e, nia husu ba diretór servisu munisipál sira atu funsiona nia knaar ho di’ak hodi haree ba Dekretu-lei númeru 84 hodi atende komunidade sira hodi atinje ezekusaun ho kualidade.
OJE 2024 ba Covalima ne’e atu finansia programa 13, sub-programa 31 ho atividade 74 tuir planu asaun anuál ne’ebé aprezenta husi diretór munisipál-sira.
Jornalista: Celestina Teles
Editora: Maria Auxiliadora
