iklan

COVALIMA, HEADLINE

MAE halo konsulta ho autoridade Covalima kona-ba PAA 2025 

MAE halo konsulta ho autoridade Covalima kona-ba PAA 2025 

MAE halo konsulta ho autoridade Covalima kona-ba PAA 2025 .

COVALIMA, 18 Abríl 2024 (TATOLI) – Ministériu Administrasaun Estatál (MAE) halo konsulta ho autoridade munisípiu Covalima kona-ba Planu Asaun Anuál (PAA) 2025 no halo aprezentasaun kona-ba baze legál no kompeténsia diretór servisu munisipál sira-nian.

Diretór Nasionál ba Planeamentu, Administrasaun Finansa no Dezenvolvimentu Lokál, Acilino Manuel Branco, hateten atividade ne’e atualiza mós planu iha nasionál nomós musínipiu, nune’e husi baze ba iha nasionál bele reflete ba preokupasaun husi komunidade nian.

“Ko’alia kona-ba Planu Asaun Anuál ba munisípiu, ita ko’alia kona-ba dezenvolvimentu. Planu Asaun Anuál ba munisípiu atu halo apresiasaun ba planu dezenvolvimentu munisípiu. Ha’u halo aprezentasaun badak ohin ba membru konsellu konsultivu kona-ba kompeténsia ne’ebé atribui ba iha autoridade munisipál”,  Acilino Manuel Branco hateten iha salaun autoridade munisípiu Covalima, ohin.

Nia esplika katak, tuir  baze legál, iha alterasaun dalimak husi dekretu-lei númeru 3/2016 ba dekretu-lei 84/2023, 23 Novembru, kona-ba estatutu administrasaun munisipál no autoridade munisipál ba dezentralizasaun administrativa ne’e kona-ba kompeténsia ne’ebé atribui ba autoridade munisipál ne’ebé haree ba área edukasaun, saúde, seguransa alimentár, obra públika, transporte no komunikasaun, bee no saneamentu báziku no ambiente, servisu agrikultura munisipál, jestaun merkadu no turizmu, servisu munisipál ba asaun sosiál, servisu munisipál ba protesaun sivíl, jestaun dezastre naturál, rejistu notariadu, servisu kadasterál no apoiu organizasaun naun-governamentál no organizasaun komunitária.

Iha sorin seluk, Diretór-Jeral ba Planeamentu Orsamentál Ministériu Finansa, José Alexandre Carvalho, aprezenta máteria kona-ba Konsulta Prosesu Planeamentu Orsamentu Jerál Estadu (OJE) no Dekretu-lei númeru 2/2022, 10 Fevereiru, sobre enkuadramentu OJE no jestaun finanseira públika, Dekretu-lei númeru 70/2023, 14 Setembru, kona-ba Lei Organika Ministériu Finansa, Dekretu-lei 84/2023, 23 Novembru, kona-ba estatutu administrasaun munisipál no autoridade munisipal ba grupu tékniku interministeriál ba desentralizasaun administrativa.

Objetivu husi atividade ne’e mak atu promove partisipasaun sidadaun sira-nia iha eloborasaun PAA iha OJE 2025, atualiza prioridade entidade sira-nian no disemina dadus relevante sira husi estatístika ho aliña nesesidade komunidade nian. Aleinde ne’e, rekolla informasaun kona-ba nesesidade no ezijénsia husi sidadaun-sira iha área hanesan hodi asesu ba servisu públiku ho kualidade no konstrusaun infraestrutura bázika no redús ki’ak.

Iha konsulta públika ba PAA, bele utiliza informasaun ne’ebé rekolla hodi dezeña sira-nia programa, sub programa no atividade ne’ebé aliña ho nesesidade no ezijénsia husi sidadaun sira, nune’e bele uza duni abordajen planeamentu ida-ne’ebé mai husi baze ba nasionál.

Iha sorin seluk, Diretór Nasionál ba Estensaun no Formasaun Agríkola, Januário Marçal, aprezenta sesaun konsulta sidadania ho estrutura governasaun munisipál ba panorama orsamentál 2024 ba proposta orsamentu Ministériu Agrikultura, Pekuária, Peska no Floresta (MAPPF) nia Planu Asaun Anuál 2024 ba autoridade munisipál.

Iha OJE 2024 MAPPF propoin millaun $53,4 hodi finansia programa haat, sub-programa 14  ho atividade 54 no iha aprovasaun hetan millaun $30,7 ne’ebé aloka ba ba saláriu no vensimentu $9.426.841, bens no servisu $9.284.942, transferénsia públika $459.007, kapitál menór $4.827.575 no kapitál dezenvolvimentu $6.695.687.

Prezidente Autoridade Munisípiu Covalima, Miguel Armanda Cardoso, hateten iha enkontru Konsellu Konsultivu Munisipál ho Ministériu Administrasaun Estatál ne’e, aprezenta kona-ba PAA.

“Ami indika diretór Servisu Munisipál Planu Integradu ba Dezenvolvimentu (SMPID) mak aprezenta projetu 30 ba tinan 2025 hodi hetan aprovasaun husi Konsellu Konsultivu Munisipál, tanba Planu Asaun Anuál 2025 munisípiu Covalima iha nia programa 13, sub-programa 31 no atividade 74”, informa.

Jornalista: Celestina Teles

Editora:Maria Auxiliadora

iklan
iklan

Leave a Reply

iklan
error: Content is protected !!