COVALIMA, 18 Abríl 2024 (TATOLI) – Prezidente Autoridade Munisípiu (PAM) Covalima, Miguel Armada Cardoso, aprezenta ona pedidu ba Ministériu Obra Públika (MOP) hodi fó orientasaun ba Institutu Jestaun Ekipamentu, Institutu Públiku (IGE, I.P) atu hasai sedimentasaun ne’ebé taka autoestrada.
“Ha’u halo ona koordenasaun verbál no submete pedidu, iha Abríl, ba Ministériu Obra Públika atu fó orientasaun ba Institutu Jestaun Ekipamentu suru rai ne’ebé taka iha autoestrada. Agora, tempu udan, nune’e rai monu hodi taka autoestrada. Hein de’it ona bainhira IGE mai hodi suru rai”, Miguel Cardoso hateten.
Nia salienta, kona-ba limpeza, PAM sei halo jestaun hamutuk ho Servisu Munisipál Água, Saneamentu no Ambiente, ne’ebé envolve mós komunidade halo limpeza iha autoestrada. “Ha’u seidauk kontrata funsionáriu kazuál, maibé semana-ne’e ha’u sei selebra kontratu ho sira hodi halo limpeza”, informa.
Tuir dadus, pesoál hamoos esgotu iha Covalima hamutuk 22 ne’ebé serbisu ho Servisu Munisipál Agua, Saneamentu no Ambiente (SMASA) ba halo limpeza iha fatin públiku.
Diretór Servisu Munisipál Obra Públika, Sidónio Gusmão, dehan, tuir diploma ministeriál númeru 42/2016 fó kompeténsia ba Servisu Obra Públika Covalima halo estrada rurál, konstrui no konserva estrada no ponte sira.
“Ba autoestrada, ami submete de’it proposta atu halo normalizasaun. Proposta ita halo ona no nia submisaun mai husi PAM hafoin hetan aprovasaun hodi haruka direta ba MOP mak fó despaixu ba IGE atu halo normalizasaun”, nia esplika.
Relembra katak Governu anteriór inaugura autoestrada Suai liga ba Fatuk Ahu, Zumalai, ho nia naruk kilómetru 30.3, ne’ebé gasta osan millaun 304, konstrui husi empreza internasionál China Overseas Engeneering Grup (COVEC).
Jornalista: Celestina Teles
Editora: Maria Auxiliadora
