iklan

POLÍTIKA

PR Horta triste SEATOU halo eviksaun la kria kondisaun

PR Horta triste SEATOU halo eviksaun la kria kondisaun

Sekretáriu Estadu Asuntu Toponomia Organizasaun Urbana-MAE, Germano Santa Brites Dias, akompaña hosi ekipa Jestaun Merkadu PNTL, F-FDTL nomós instituisaun relevante sira sobu no hasai komunidade sira-ne’ebé durante ne’e okupa espasu públiku iha Aitarak Laran, Dili, kuarta (17 abríl 2024). Imajen/Tatoli.

DILI, 18 abríl 2024 (TATOLI)—Prezidente Repúblika, José Ramos Horta, sente triste bainhira haree polítika husi Governu liuhosi Sekretariu Estadu Asuntu Toponímia no Organizasaun Urbana (SEATOU) halo eviksaun ba barraka komunidade nian iha sidade Dili maibé la kria kondisaun.

Notísia Relevante: Ekipa SEATOU sobu uma no barraka 40 iha Bidau Santa-Ana

“Antes hasai presiza halo diálogu no Governu presiza prepara fatin ruma no hadi’a merkadu ne’ebé iha daudaun ona tanba merkadu sira-ne’e insustentável loos. Merkadu Taibesi laiha kondisaun hanesan saneamentu bee-moos laiha,” Xefedente Horta hateten ba Jornalista hafoin partisia abertura sensibilizasaun programa Edukasaun Multi Lingua,iha  salaun Ian Martin, INFORDEPE, Balide, kinta ne’e.

Primeiru, Xefe Estadu ne´e hateten, Prezidente Autoridade Munisípiu Dili (PAM Dili) haree ida-ne’e para muda ema sira-ne’e mezmu faan iha estrada ninin sira-ne’e, husik sira nafatin iha ne’ebá maibé labele halo konstrusaun permanente no labele toba iha ne’ebá, hodi hadi’a fatin ho dignidade no ijene.

Xefe Estadu haktui, nia lakohi interfere partense ba Munisípiu Dili maibé hakarak duni ema sai husi fatin ida tenke kria kondisaun, tanba sidadaun sira-ne’e ho nesesidade kosar ho difikuldade buka moris, sira la halo problema no sira buka moris ho sakrifísiu loos iha loron manas, atu sustenta aan no família.

Prezidente Republika hateten, loos duni katak labele okupa fatin hotu sai merkadu, maibé antes sai presiza halo diálogu no Governu presiza prepara fatin antes hasai negosiante sira.

Prezidente Horta sente triste bainhira haree asaun ne’ebé halo husi SEATOU hodi sobu komunidade sira-nia baraka ne’ebé harii iha estrada publiku nomós hela iha valeta leten sira-ne’e.

Notísia Relevante: Ekipa SEATOU sei tun organiza área protejida Tasi-tolu iha inísiu maiu

“Ha’u haree ida-ne’e triste hela. Buat sira-ne’e iha konsekuénsia polítika. Eleisaun seluk mai, sira-ne’ebé uluk vota ba ó ne’e, sira sei lembra katak ha’u vota ba ó depois ikus ó tebe sai fali ha’u, ne’ebé agora ne’e labele mai hamaus fila-fali,” nia dehan.

Ho asuntu ne’e, Xefe Estadu dehan, sei ko’alia ho Primeiru-Ministru (PM), Kay Rala Xanana Gusmão bainhira halo enkontru semanál, tanba Xanana nia fuan ba povu ne´e boot tebes.

“Avo Nana ema ida fuan ne’e sensivél tebes. Ha’u lembra kuandu tribunál fo orden despezu duni sai famália ida iha Becora, Avo Nana ba iha ne’ebá tuur iha varanda dezafia orden tribunál duni sai tiha polísia, tanba lakohi duni sai ema, tanba ne’e tulun sensiblidade,” nia dehan.

Tanba ne’e, Prezidente Repúblika lamenta bainhira SEATOU tun halo eviksaun bolu PNTL no F-FDTL akompanha hotu, ida-ne’e la’ós papel ka kompeténsia konstitusionál Forsa Armada nian.

PNTL apoiu Governu bele maibé ho edukasaun no sivilidade la’ós ba bolu fali Forsa Armada mós tun hotu akompaña halo eviksaun ba barraka komunidade sira-nian.

“Se ha’u mak Xefe Estadu Maiór Jenerál ha’u la fó orden ba ha’u-nia Forsa atu ba mete iha situasaun sira-ne’e,” nia dehan.

Entretantu, ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.

Notísia Relevante: Ekipa konjunta kontinua sobu uma no barraka 20-resin iha Aitarak-laran

Jornalista : Osória Marques

Editór     : Cancio Ximenes

iklan
iklan

Leave a Reply

iklan
error: Content is protected !!