Xefe Estadu fó pose ba Luís Sequeira nu’udar Embaxadór TL ba Moçambique
DILI, 18 abríl 2024 (TATOLI) – Prezidente Repúblika José Ramos Horta, kinta ne’e, iha Palásiu Prezidensiál Bairru-Pite fó pose ba Luís Miguel Lopes de Sousa Sequeira, nu’udar Embaixadór Foun Estraordináriu no Plenipotensiáriu Timor-Leste nian ba Repúblika Moçambique.
Timor-Leste no Moçambique, iha diskursu Prezidente repúblika hateten, iha relasaun istórika no kulturál hanesan eis-koloniál Portugés. Nasaun rua ne’e estabelese relasaun diplomátika iha 2002, lakle’ur depois Timor-Leste hetan independénsia.
“Sira mantein nafatin relasaun polítika amigavel, hodi hatudu apoiu ba malu ba dezenvolvimentu no esforsu sira atu harii nasaun. Área prinsipál sira ba kontinuasaun parseria inklui edukasaun kruzada, justisa no kooperasaun jurídika, jestaun rekursu naturál sira, no serbisu hamutuk hodi alkansa Objetivu Dezenvolvimentu Sustentavel ONU nian,” Prezidente afirma.
Xefe Estadu reitera, Timor-Leste iha kompromisu atu apoiu dezenvolvimentu no seguransa Moçambique nian liuhusi ligasaun fraternál espesiál hanesan nasaun sira ne’ebé ko’alia lian Portugés.
Iha oakaziaun ne’e, Embaxadór Luís kompromete, durante mandatu sei hametin liután relasaun di’ak entre Timor-Leste ho Moçambique no hametin tan kooperasaun iha área oioin.
“Prióridade balun ne’ebé ita presiza hametin iha kooperasaun mak hanesan iha área edukasaun, ho formasaun. Ita iha estudante balun ne’ebé agora daudaun estuda hela iha Universidade Eduardo Moçambique, ita mós sei hametin liután kooperasaun,’ diplomata timoroan ne’e dehan.
Embaxadór Luís nomeadu hodi troka Embaixadór anteriór Francisco Miranda Branco ne’ebé termina ona nia mandatu.
Embaixadór foun Luís Miguel, semana oin, dezloka ona ba Maputo atu halo kontinuasaun servisu misaun diplomátika.
Embaxadór Luís sei asumi kargu Embaxadór Timor-Leste iha Moçambique durante tinan tolu.
Esperiénsia serbisu Embaxadór Luís
Nomeasaun Embaixadór Luís Sequeira reprezenta kompromísiu ne’ebé metin ba Timor-Leste atu hasa’e no hametin liután kooperasaun bilaterál no amizade entre nasaun rua ne’e.
Embaixadór ne’e nu’udar profisionál timoroan ida-ne’ebé iha susesu boot tebes iha área análize polítika, koordenasaun programa, kapasitasaun no fortalesimentu institusionál ba organizasaun internasionál sira hanesan Banku Dezenvolvimentu Aziátiku (ADB), Banku Mundiál, no AusAID.
Iha mestradu oioin husi Universidade Nasionál Austrália, inklui iha Diplomasia, Asuntu Internasionál no Polítika Públika. Sequeira hatudu ona kompromísiu kle’an ba edukasaun no dezenvolvimentu profisionál.
Nia dezempeña knaar seniór oioin, inklui nu’udar Koordenadór Prinsipál ba Asisténsia Téknika ADB nian ba Bee Timor-Leste husi tinan 2021 to’o 2023, Analista Polítika ba Servisu Bee no Urbanu no Konselleiru Polítika Bee nian ba ADB, Adidu Edukasaun ba Brazil ho Ministériu Edukasaun Timor-Leste, Asesór Senior Polítika Públika ho Sekretáriu Estadu ba Haforsa Institusionál, Asesór Nasionál ba Desentralizasaun ho Banku Mundiál, no Koordenadór Seniór no Pontu Fokál Jéneru ho AusAID.
Fluente iha lian Tetun, Portugés, Inglés no Indonézia, Sequeira mós okupa kargu lideransa iha organizasaun desportiva sira.
Jornalista: Hortencio Sanchez
Editór: Rafael Ximenes de A. Belo
