Xefe Estadu fó tan apoiu ba ema ho difisiénsia iha Covalima

DILI, 18 abríl 2024 (TATOLI) – Prezidénsia repúblika liuhusi Asesór asuntu inkluzaun sosiál, Gaspar Afonso, hahú tersa to’o kinta ne’e, kontinua fó apoiu sosiál ba família ema ho difisiénsia iha Postu administrativu Fatululik, Fohorem, Tiliomar, Zumalai no Fatumea, Munisípiu Covalima.

Apoiu sosiál hirak ne’e mak hanesan, foos, mina ba te’in, parsela ba hahan inklui Kulsaun. Apoia ne’e fó husi uma ba uma ne’ebé ema ho difisiénsia sira hela ba.

“Apoiu ne’e hanesan kontinua Polítika Prezidente Repúblika atuál ba asuntu inkluzaun sosiál atu labele husik ema ida iha kotuk no hatudu domin ba sira ho difisiénsia no atu fanun polítika Governante sira atu tau-matan ba ema ho difisiénsia iha área rurál,” Gaspar Afonso hateten liuhusi nota ne’ebé Agência TATOLI asesu hosi media Palásiu Prezidensiál, kinta ne’e.

Afonso dehan, la’ós fahe de’it sasan (Sosiál) maibé meiu ida mós atu haree ema ho difisiénsia sira-nia kondisaun moris inklui enkoraza sira no ba futuru, halo polítika ida atu halo atendimentu di’ák liután ba sira iha área rurál liu-liu sira ne’ebé hela iha área izolada liu.

Família ema ho difisiénsia sira ne’ebé seidauk hetan apoia sosiál ne’e, reprezentante ema ho difisiénsia iha Gabinete Palásiu Prezidensiál esplika katak, sei la halo diskriminisaun ba ema ida no esforsu katak ba oin sei hetan hotu apoiu sosiál ne’ebé oferese husi Prezidénsia Repúblika tanba programa ne’e mai husi inisiativa Prezidente Repúblika, José Ramos Horta, dezde nia mandatu da-ruak iha tinan 2022.

Entretantu, Xefe Aldeia Belulik-Kraik, Suku Belulik-Leten, Postu administrativu Fatumea, reprezenta família ema ho difisiénsia ho matan-been, espresa nia agradesimentu ba Xefe Estadu atuál.

“Ha’u sente kontente no agradese tanba ami-nia komunidade ema ho difisiénsia sira hetan apoiu husi Prezidente Repúblika,” expresa Xefe Aldeia Belulik-Kraik, Alfredo de Araujo.

Antes to’o iha munisípiu Covalima, loron rua ba kotuk (15 abríl), ekipa inkluzaun sosiál hala’o uluk atividade apoia sosiál iha munisípiu Bobonaro, iha Postu administrativu Bobonaro no Lolotoe ho totál benefisiáriu na’in 15 no loron tuirmai kontinua iha munisípiu Covalima iha Postu administrativu Fatulik, Fohorem, Tiliomar no Fatumea hamutuk na’in-44 inklui Zumalai iha família ida sai benefisiáriu nune’e totál husi munisípiu Bobonaro no Covalima, iha benefisiáriu hamutuk nain 60.

Jornalista: Hortencio Sanchez

Editór: Rafael Ximenes de A. Belo