DILI, 17 abríl 2024 (TATOLI)-Jerente Jerál Empreza Karya Timor, Nasrol Naslin, kompromete ninia parte sei finaliza projetu konstrusaun altar misa Sua Santidade Amu Papa Francisco iha Tasi-Tolu, durante fulan haat nia laran.
“Ami otimista ba fulan haat mai ami sei konklui obra, tenda ne’ebé ami monta atu monta iha ne’e moos prodúz ona iha Indonézia no sei to’o iha Timor-Leste iha meadu maiu,” nia hateten bainhira Governu hamutuk ho igreja halo lansamentu fatuk dahuluk ba kontrusaun altar misa iha Tasi-Tolu Dili, kuarta ne’e.
Nia dehan, parte kompañia sei kontinua koordena ho Ajénsia Dezenvolvimentu Nasionál (ADN) hodi observa no fiskaliza durante prosesu konstrusaun nune’e bele garante obra ne’e ho kualidade di’ak tuir dezeñu no BOQ ne’ebé mak iha.
Iha fatin hanesan Diretór Ezekutivu Ajénsia Dezenvolvimentu Nasionál, Institutu Públiku (ADN, I.P), Rui Lourenço da Costa, hateten kosntrusaun altar ne’e reprezenta prasa Vatikanu nian no mós relasaun bilaterál entre Santa Sé ho Vatikanu.
Aleinde, konstrusaun ba altar misa foun ne’e, kompañia sei halo mós reabilitasaun ba altar antiga ne’ebé maka Amu Papa João Paulo II uja hodi selebra misa iha tinan 1989 bainhira hala’o vizita mai Timor-Leste. Hala’o mós instalasaun ba haris fatin no bee moos iha fatin selebrasaun misa.
“Konstrusaun sei hotu iha fim de jullu,” Diretór Ezekutivu Ajénsia Dezenvolvimentu Nasionál, Institutu Públiku (ADN, I.P), Rui Lourenço da Costa hateten.
Konstrusaun altar no prasa ne’e ho medida diametru 50, altar iha 17×35 metru, obra ne’e sei gastu orsamentu hamutuk millaun ida dollar amerikánu ($).
Nune’e mós, Ministru Administrasaun Estatál (MAE), Tomas do Rosário Cabrál, informa kona-ba fatin selebrasaun misa iha Tasi-Tolu Dili ne’e hetan aseitasaun hosi ekipa avaliasaun hosi Vatikanu ne’ebé maka hala’o ona vizita mai Timor-Leste iha fulan-janeiru 2024.
“Foufoun Governu hanoin fatin tasi ibun ne’ebá, maibé ekipa avansadu hosi Vatikanu iha fatin ne’e. Igreja ho Governu no reprezentante Vatikanu mak koordena servisu ne’e, governu iha papel atu apoiu igreja,” Governante ne’e informa iha serimonia lansamentu fatuk dahuluk konstrusaun altar misa iha Tasi Tolu, kuarta ne’e.
Kona-ba dezeña kontrusaun altar misa ne’e aprezenta hosi Vatikanu, Governu no Igreja Timor-Leste hetan parseira di’ak hodi realiza obra ne’e.
Entretantu, serimonia lansamentu fatuk dahuluk ba kontrusaun altar misa iha Tasi-Tolu ne’e partisipa hosi Núnsiu Apostóliku Vatikanu nian iha Timor-Leste, Marco Sprizzi no Arsebispu Arkedioseze Metropolitana Dili, Dom Vírgilio Kardeál do Carmo da Silva,SDB.
Tuir orariu Sua Santidade Papa Francisco sei hala’o vizita mai Timor-Leste, iha loron 09 to’o 11 fulan-setembru 2024.
Jornalista: Jesuína Xavier
Editor: Agapito dos Santos
