DILI, 19 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) no igreja kuda Ai-Kameli hun 25 iha areadór Igreja Katedrál, iha Vila Verde, hodi promove plantasaun ne’e hanesan símbolu identidade Timor-Leste nian ba sarani sira.
Sekretáriu Estadu Floresta, Fernandino Vieira, haktuir katak atividade kuda Ai-Kameli ne’e ho objetivu atu promove identidade Timór nian, tanba daudaun ne’e ema barak mak seidauk hatene modelu ai ida ne’ebé hanesan símbolu nasaun nian.
“Serimónia kuda Ai-Kameli iha areadór igreja ne’e atu partilla informasaun ba komunidade no ba sarani sira katak kuda ai ne’e importante tebes no husu ba ema hotu atu iha nafatin konxiénsia hodi konserva Ai-Kameli nu’udar ita-nia identidade no buka mós atu hadomi ai sira seluk iha nasaun ne’e”, Sekretáriu Estadu hateten iha Vila Verde, ohin.
Governante ne’e salienta katak atividade kuda ai-oan ne’e atu konserva no proteje rekursu floresta hodi dezenvolve sai rekursu ekonómiku nasaun nian, bainhira iha futuru mina no gás maran ona, rekursu floresta maka sei substitui fali sira.
Ministru Agrikultura, Pekuária, Peska, no Floresta, Marcos da Cruz, salienta ema nia vida depende mós iha ai-nia moris, tanba husi ai-horis ne’e mak sei hamosu bee, sei sai fatin ba biodiversidade sira iha rai leten atu moris ba. Programa kuda ai-horis sira iha territóriu ne’e bele kontribui hamatak nasaun ne’e, nomós halo redusaun ba dezastre naturál.
“Ita buka atu konxiensializa timoroan hotu, la’ós de’it parte igreja no autoridade sira, maibé povu iha Timór laran tomak atu serbisu hamutuk hodi kuda fali ai sira, inklui Ai-Kameli nu’udar identidade Timór nian”, dehan.
Nia mós konvida ema hotu atu serbisu hamutuk ho Ministériu Agrikultura, nune’e bele hamatak fali nasaun ne’e liuhusi asaun protesaun ba biodiversidade hodi bele atrai turista sira mai vizita nasaun.
Arsebispu Metropolitana Dili, Dom Virgílio Kardeál do Carmo da Silva, agradese ba Governu tanba serimónia kuda Ai-Kameli iha igreja Katedrál, “tanba ne’e hakarak informa katak Katedrál nu’udar uma-boot ba sarani sira, liuhusi atividade kuda Ai-Kameli ne’e bele hamatak fatin ida ne’e”.
Saserdote ne’e salienta katak kuda Ai-Kameli ne’e tanba ai ne’e orijinál Timór nian. “Iha tempu uluk, ema sira husi fatin-fatin hakarak mai vizita Timór la’ós de’it buat seluk, maibé tanba Ai-Kameli nia morin”.
Nia husu ba timoroan kontinua promove nia identidade ba mundu, dalan ida maka ema ida tenke kuda Ai-Kameli hun ida iha nia uma, nune’e baihira ema sira husi fatin-fatin mai vizita, sira bele haree Ai-Kameli no sira bele sente Timór nia morin hanesan duni Ai-Kameli.
Jornalista: Tomé Amado
Editora: Maria Auxiliadora
