iklan

POLÍTIKA

KHUNTO sei realiza kongresu nasionál da-haat iha aban

KHUNTO sei realiza kongresu nasionál da-haat iha aban

Emblema Partidu KHUNTO. Imajen Tatoli/Francisco Sony

DILI, 19 abríl 2024 (TATOLI)—Partidu Kmanek Haburas Unidade Nasionál Timoroan (KHUNTO), sei realiza kongresu nasionál ba da-haat durante loron rua ne’ebé sei hahú iha sábadu (20 abríl2024) aban no sei ramata iha domingu (21 abríl 2024) iha salaun Delta Nova, Comoro.

Notísia Relevante: Armanda Berta Re-eleita Lidera KHUNTO ba Períudu 2020-2024

“Ami partidu KHUNTO sei realiza kongresu nasionál ba da-haat durante loron rua, hahú aban  to’o bainrua ,” Segundu Vise Bankada KHUNTO iha Parlamentu Nasionál (PN), Deputadu Luis Roberto da Silva, hatete ba jornalista sira iha uma-fukun Parlamentu, sesta ne’e.

Kongresu ne’e, tuir nia, normalmente dahuluk ko’alia kona-ba estatutu partidu hodi haree artigu ruma atu halo alterasaun tanba estututu mak nu’udar giaun jere partidu ne´e, no sei hili estrutura foun partidu nian ba kargu prezidente no sekretáriu jerál ba periódu 2024-2028, tanba estrutura anteriór ninia mandatu ramata ona.

“Kona-ba lista kandidatu agora seidauk iha, ne’ebé orsida iha forum mak deside liuhusi ami-nia kongresista sira,” nia dehan.

Antes to’o ba kongresu nasionál, nia dehan, partidu KHUNTO mós hala’o ona preparasaun dezde iha fulan-marsu ne´e hodi hahú halo konferénsia munisipál iha munisípiu sira hotu iha territóriu.

Iha kongresu nasionál ne’e sei partisipa kuadru partidu ema na’in-50 kada munisípiu ida-idak inklui Rejiaun Administrativa Espesiál Oé-Cusse Ambeno (RAEOA), no sei konvida bainaka espesiál hanesan Prezidente Repúblika, José Ramos Horta, líder nasionál ho lideransa partidu polítiku husi partidu seluk, entidade igreja, sosiedade sívil ho konvidadu sira seluk.

Jornalista : Nelson de Sousa

Editór       : Cancio Ximenes  

iklan
iklan

Leave a Reply

iklan
error: Content is protected !!