Membru PNTL 71 entrega atributu OAM no OAR iha Baucau
BAUCAU, 19 abríl 2024 (TATOLI) – Membru Polísia Nasionál Timor-Leste hamutuk na’in-71 ofisialmente intrega atributu organizasaun arté marsiál iha komando munisípiu Baucau.
Ministru Interiór (MI), Francisco da Costa Guterres, esplika, seremónia referida hala’o bazeia ba despaisu MI loron-13 dezembru 2023, nune’e iha loron-07 dezembru 2023 liuhusi Primeiru-ministru Kayrala Xanana Gusmão, simbolikamente, rekolla ona atributu organizasaun nian husi membru PNTL sira iha resintu Palásiu Governu.
“Ha’u agradese ba sira-ne’ebé voluntariamente hakarak mai hatudu katak sira Onra ba Estadu no Povu ida-ne’e, seremónia ne’e hatudu membru PNTL sira entrega ona atributu OAM no OAR Estadu,” Ministru Interiór hateten iha Vila nova, sesta ne’e.
IX Governu konsidera Estadu Timor-Leste investe no hakarak PNTL sai nu’udar institusaun ne’ebé profesionál, neutru no imparsiál hodi servi de’it povu no Estadu.
Estadu Timor-Leste harii, PNTL harii ho objetivu tau-matan ba Povu no Nasaun, asegura situasaun husi kaulker asaun la’ós haree ba grupu organizasaun no partidu. Tanba ne’e, husu membru hotu atu garante seguransa iha komunidade nian leet atu asegura pás no estabilidade iha rai-laran.
“Se mak loos husik, se mak sala hatudu lei, bainhira hala’o servisu laiha família. Se de’it, tanba objetivu finál mak lei no orden, nune’e hatudu katak Polísia iha kapasidade,” Francisco akresenta.
Alende intrega atributu Arté Marsiál no Rituál ne’e, membru sira halo mos juramentu no re’in Bandeira Nasionál no Bandeira Institusaun PNTL nian, hodi hatudu ba públiku katak, dezvinkula ona husi grupu organizasaun refere.
Segundu Komadante PNTL, Komisáriu Polísia, Pedro Belo, hato’o agradese Governu liuhusi Ministériu Interiór (MI) tanba kria ona despaisu hodi orienta membru PNTL sira ne’ebé durante envolve aan iha grupu Organizasaun Arte Marsiál no Rituál, atu entrega atributu organizasaun nian ba Estadu.
“Programa entrega atributu sira ne’e di’ak tebes no hatudu ba Estadu katak, Polísia servi de’it mak Povu no Estadu, hatudu katak Polísia servi de’it ba rai ida-ne’e no povu ida-ne’e, laiha organizasaun seluk seluk,” Pedro Belo hateten.
Iha seremónia ne’e, membru PNTL sira halo mós juramentu hanesan, hahú ba oin sei la envolve tan iha organizasaun arte marsiál no rituál no deklara aan hodi re’in Bandeira Nasionál no Bandeira Institusaun PNTL nian.
Alende ne’e, jura ho onra sei asumi konduta no postura étika ne’ebé respeita integralmente konteúdu dever Polísia hodi asegura dignidade no prestíjiu PNTL.
Husi totál membru PNTL na’in-71 maihosi komando Polísia munisípiu tolu hanesan Lautém hamutuk neen, Manatuto 24 no Baucau hamutuk na’in-41.
Jornalista : Natalino Belo
Editór : Rafael Ximenes de A. Belo
