HONIARA, 19 abríl 2024 (TATOLI)- Organizasaun g7+ liuhusi misaun observatóriu ba eleisaun jerál, iha Illa Salomon, iha loron 17 abríl ne’e, ekipa observasaun rekomenda pontu prinsipál neen bazeia ba rezultadu observasaun ne’ebé halo ona ba sentru votasaun sira iha Kapitál Honiara no Provinsia Guadalcanal, ne’ebé observa estasaun votu hamutuk 45.
Sekretáriu jerál g7+, Helder da Costa, hateten, rekomendasaun sira ne’ebé mak hato’o hodi hadi’a di’ak liután mak sira-nia sistema atendimentu públiku ba eleitór sira liuhusi órgaun eleitorál Illa Salomon nian.
“Rekomendasaun lubun ida ita fó liu-liu kontinua halo edukasaun sívika, fó formasaun liután ba ofisiál eleitorál hodi hasa’e koñesementu no abilidade iha jestaun ba eleisaun, kontinua nafatin hadi’a mekanizmu eleisaun hanesan layout no kestaun tékniku no administrativu,” Sekretáriu jerál g7+ hateten, hafoin hato’o konferénsia imprensa ba media nasionál no internasionál relasiona ho misaun observatóriu g7+, iha otel Heritage, Honiara, Illa Salomon, ohin.
Iha oportunidade ne’e, Prezidente Komisaun Nasionál, Eleisaun Illa Salomon, Jasper Highwood Anisi, hato’o agradesementu ba observadór g7+ ne’ebé partisipa ona hodi hala’o observasaun ba eleisaun jerál no konjunta ne’ebé realiza ona iha loron 17 abríl 2024 ne’e.
“Dala ida tan agradese ba organizasaun g7+ nia observasaun ba eleisaun konjunta ka join election ne’ebé realiza iha loron 17 abríl liubá, ohin mai hato’o ona relatóriu no rekomendasaun sira, hein katak ho rekomendasaun sira ne’e bele ajuda ami nune’e fasilita di’ak liután serbisu sira ein-relasaun ho jestaun eleitorál nian iha futuru,” autoridade másima CNE, Illa Salomon ne’e hateten.
Entertantu, misaun observatóriu ba eleisaun konjunta ka join election ne’ebe kompostu husi eleisaun ba membru parlamentu, eleisaun ba governu lokál provinsia nian, no eleisaun ba konsellu munisipál Honiara, ekipa misaun observatóriu rejista pontu prinsipál neen no rekomenda órgaun eleitorál Illa Salomon atu mellora iha futuru mak hanesan:
1. Hasa’e edukasaun sívika ba votante sira hodi promove demokrasia no fortalesimentu institusionál hodi harii sosiedade ida pasífiku;
2. Kontinua formasaun hodi hasa’e konesementu no abilidade liuhusi kapasitasaun hodi garantia prátika di’ak no konsisténsia iha jestaun eleisaun;
3. Bele tuir esperiénsia mós husi país membru g7+ kona-ba verifikasau eleitór sira ho diretriz ida klaru hodi vota tuir naran alfabetu nian;
4. Konsisténsia iha lista verifikasaun eleitór sira ho lista asembleia votu nian hodi garante prosesu votasaun ho di’ak;
5. Kria espasu ne’ebé seguru hodi fasilita votante vota ho segredu, no;
6. Rekomenda atu ofisiál eleitorál sira tenke rekruta tuir jeografia ne’ebé hela nune’e bele ezerse nafatin direitu votu.
Jornalista :Anito Soares
Editór: Rafael Ximenes de A. Belo
