PR Horta haksolok TR absolve António “Kalohan” hosi pena efetiva
DILI, 18 abríl 2024 (TATOLI)—Prezidente Repúblika, José Ramos Horta, sente haksolok bainhira Tribunal Rekursu absolve kazu António da Conceição “Kalohan” husi kazu ne’ebé antes ne’e Trbunal Judisial Primeira Instansia Díli (TJPID) liuhusi desizaun ikus kondena Sekretáriu Jerál Partidu Demokrátiko, António da Conceição “Kalohan”, ba tinan lima kadeia ba krime partisipasaun ekonomia iha negósiu.
Notísia Relevante: Tribunál Rekursu absolve António Kalohan hosi pena efetiva prizaun tinan lima
Ha’u kontente, ha’u espera kazu seluk Tribunál Rekursu mós sei haree ida-ne’e. Ha’u haree Governu mós hakarak haree auditória iha justisa, ne’e la’ós kontra justisa. Auditória para halo saida, la’os para halo peesegisaun, auditória para haree saida mak sala, saida mak tenke hadi’a. Ha’u haksolok finalmente “Kalohan” nia naran hamoos,” PR Horta hatete bainhira partisipa abertura sensibilizasaun ba programa Edukasaun Multi Língua, iha salaun Ian Martin INFORDEPE, Balide, kinta ne’e.
Xefe Estadu hatutan, kontente tanba finalmente Tribunál Rekursu (TR) absolve António “Kalohan”, tanba kazu ida-ne´e akontese barak ba timoroan.
“Ha’u kontente no hato’o parabéns ba Tribunál bele absolve “Kalohan” tanba haree dalan loos,” Ramos Horta dehan.
Xefe Estadu dehan, foin lalais Tribunál Rekursu absolve ona António Kalohan husi krime partisipasaun ekonómia no negósiu hatudu katak akuzasaun husi Ministeriu Públiku fraku no juis sira iha Tribunal Judisial Primeira Instánsia Díli lahalo análiza didi’ak antes foti desizaun.
Antes ne´e, iha 12 abríl 2024, Defeza hosi arguidu António da Conceição ‘Kalohan’ Advogadu Privadu Pedro Camoes, dehan Tribunál Rekursu deside hodi absolve arguidu António da Conceição ‘Kalohan’ hosi pena efetivu prizaun tinan lima ba krime partisipasaun ekonomia iha negósiu.
“Loos, Tribunal Rekursu hasai ona desizaun ba ami-nia rekursu ne’ebé foin daudaun ha’u hatama. Tribunál Judisiál Primeiru Instánsia Dili notifika uluk ha’u nia kliente António da Conceição, iha notifikasaun ne’e, Tribunál Rekursu absolve ha’u-nia kliente hosi pena efetivu prizaun tinan lima ba krime partisipasaun ekonomia iha negósiu ne’ebé Ministeriu Públiku imputa ba ha’u-nia kliente,” Defeza hosi arguidu António da Conceição ‘Kalohan’ Advogadu Privadu Pedro Camoes hateten ba Tatoli via telefone, sesta ne’e.
Tribunál Rekursu haree laiha faktu sufisiente ne’ebé kondena antigun Ministru Komérsiu Indústria (MCI) ba pena efetivu tinan lima liga ba krime partisipasaun ekonomia iha negósiu ne’ebé Ministeriu Públiku imputa ba nia.
Jornalista : Osória Marques
Editór : Cancio Ximenes
