Sistema eletróniku softwork msupply ajuda monitoriza problema stockout ai-moruk
DILI, 18 abríl 2024 (TATOLI)–Diretór Nasionál Farmásia no Medikamentu (DNFM) iha Ministériu Saúde, Delfin Ferreira hateten, sistema Msupply ajuda profesionál saúde sira atu relata no monitoriza informasaun kona-ba stockout ai-moruk iha ospitál, sentru Saúde no postu saúde sira iha territóriu nasionál.
“Ema ko’alia ko-naba stockout no jestaun ne’ebé ladi’ak, entaun, ita hanoin katak ita labele ho situasaun ida ne’e. Ita tenke sai hosi ida ne’e, tanba ne’e, mak sistema Msupply ajuda tebes ita para ita iha dadus informasaun ko-naba stock medikamentu no ekipamentu médiku ne’ebé hotu-hotu integra tuir sistema saúde,” Diretór DNFM, Delfin Ferreira, informa bainhira halo avaliasaun ba sistema eletrónika ba informasaun saúde nian ho responsável sira hosi ospitál no sentru saúde sira iha Timor Plaza, Dili, kinta ne’e.
Notísia Relevante :Farmásia Saúde Covalima presiza ai-moruk tipu 11
Nia hateten sistema eletronika msupply ne’e hetan apoiu tékniku no finansiamentu hosi parseiru dezenvolvimentu hanesan Australian Government Department of Foreign Affairs (DFAT).
Iha fatin hanesan, Responsavél Farmásia Munisípiu Dili, Anita Carolina Ximenes, hateten sistema msupply tulun tebes sira hodi halo kontrola kona-ba utilizasaun ai-moruk iha fasilidade saúde sira.
“Iha progresu di’ak, tanba ami bele kontrola ai-moruk ne’ebé iha no hotu iha fasilidade saúde. Ami uza sistema online hodi halo pedidu hodi hetan distribuisaun ai-moruk ba sentru no postu saúde,” nia hateten.
Sistema msupply ne’e fasilita tebes servisu profesionál saúde sira-nian, maibé internet sai problema boot nune’e maka sentru saúde no postu saúde balun sei offline hodi nafatin uja sistema manuál.
Reprezentante Australian Government Department of Foreign Affairs (DFAT), iha Timor-Leste, Deidre Ballinger, hateten DFAT sei servisu di’ak liutan hodi rezolve dezafiu sira hodi hamentin sistema saúde iha Timor-Leste.
Sistema msupply estabelese ona iha servisu saúde komunidade no postu saúde iha teritóriu Timor laran hodi monitoriza stockout ai-moruk no ajuda Institutu Nasionál Farmacia no Produtu Medikamentu atu jere hodi sosa ai-moruk bainhira stockout.
“Msupply seidauk atinje ho másimu, tanba ita bo’ot mak ema ne’ebé iha kapasidade atu reforsa msupply,” nia hateten.
Notísia Relevante :Klínika Bairru-Pité falta ai-moruk anestezia
Jornalista: Jesuína Xavier
Editór: Agapito dos Santos
