VIQUEQUE

Abitante Bahalarauain realiza expo no desportu festeza restaurasaun independénsia Timor-Leste

Abitante Bahalarauain realiza expo no desportu festeza restaurasaun independénsia Timor-Leste

Prezidente Autoridade Munisípiu (PAM) Viqueque, Francisco C.S de Gonzaga. Imajén Tatoli/Vitorino Lopes da Costa

VIQUEQUE, 21 abríl 2024 (TATOLI)-Abitante sira hamutuk ho autoridade suku Baharauain, Postu administrativu Viqueque, munisípiu Viqueque ho inisíativa realiza atividade ezpozisaun no jogu futeból hodi festeza loron restaurasaun independénsia, 20 fulan-maiu ba dala-22.

Prezidente Autoridade Munisípiu Viqueque, Francisco Cruz S.de G Soares, fó esperansa ba abitante suku Bahalarauain sira atu asegura no kontrola eventu komemorasaun ida-ne’e hodi to’o finál hodi hatudu ba suku seluk.

“Expo ida-ne’e hala’o hodi komemora loron Restaurasaun Independénsia no ha’u espera katak feira ne’e bele to’o nia rohan atu hatudu diferente hosi ita ba ema seluk katak Viqueque-oan ema ne’ebé iha kualidade, matenek. Ita tenke kaer-metin kultura,” PAM Viqueque hateten.

Nune’e líder munisípiu Viqueque ne’e husu ba inan-aman sira, atu tau-matan ba oan sira atu nune’e eventu ne’ebé Suku Bahalarauain bele to’o nia rohan hodi husik hela buat furak ba iha Munisípiu Viqueque.

Iha biban ne’e, Administradór postu administrativu (APA) Viqueque-Vila, Leopoldo da Costa Alves husu ba Suku Bahalarauain, Luca no Bibileo liuliu ba Bahalarauain sai ezemplu unidade ba suku sanulu (10) seluk iha postu Viqueque-Vila.

“Ita husu nafatin ba Suku tolu (3), atu sai ezemplu ba Suku seluk atu nune’e labele konta ona iha suku sanulu (10) Bahalarauain mak lista mean maibé ita fila lista mean ba mutin katak unidade primeiru hahú husi Bahalarauain liuhusi eventu sira ne’e”.

Leopondo husu, ba abitante sira liuliu joven sira atu muda pensamentu uluk hodi hahú hanoin foun ba progresu dezenvolvimentu iha Munisípiu Viqueque.

Iha okaziun ne’e xefe Suku Bahalarauain, Ângelo Laranjinha Pinto, haktuir, eventu ne’e hanesan ezijénsia husi komunidade sira hodi selebra loron restaurasaun Independénsia Timor-Leste no eventu realiza tanba serbisu hamutuk entre Konsellu Suku ho abitante suku ida-ne’e.

“Programa ne’e realiza tanba ezijénsia husi ita-nia abitante sira Bahalarauain hotu hakarak komemora loron Restaurasaun Independénsia. Ha’u fiar katak ita hotu nia hamutuk sei lori suku Bahalarauain ba oin,” Xefe Suku Bahalarauain, hateten iha seromónia abertura iha suku Bahalarauain, ohin.

Eventu ne’e hahú abertura domingu ne’e durante fulan ida (1) to’o loron 20 fulan-maiu. Objetivu husi eventu referidu hodi festeza hamutuk ho povu iha ámbitu komemorasaun independénsia Timor-Leste.

Abertura eventu ne’e partisipa husi Veteranu suku Bahalarauain, Reprezentante Komandante Polísia Nasionál Timor Leste (PNTL) munisípiu Viqueque, no Xefe Suku Luca, Bibileo no Uma-Quik.

Jornalista:Vitorino Lopes da Costa

Editór       : Rafael Ximenes de A. Belo

iklan
iklan

Leave a Reply

iklan
error: Content is protected !!