DILI, 21 de abríl de 2024 (TATOLI) – Arcebispo Metropolita Díli, Dom Virgílio Cardeal da Silva, akompaña husi Vise-Primeiru-Ministru, Mariano Assanami Sabino, domingu loraik ne’e, hamutuk ho sarani suku Bairro-Pite, Postu Administrativu Dom Aleixo, Munisípiu Díli, halo inaugurasaun ba Kapela Nossa Senhora do Rosário de Fátima.
Dom Virgílio Kardeal da Silva, hatete, eventu ne’e la’ós atu inaugura de’it kapela, maibé hanesan aktu ida hodi rekoñese servisu, sakrifísiu no dedikasaun husi individu inklui sarani hotu ne’ebé fó ona kontribuisaun to’o finaliza obra ne’e.
“Kreda ne’e la’ós de’it hanesan uma ka edifísiu ida, maibé tanba sarani ne’ebé iha fiar ida, lolo-liman ba malu no aprende atu servisu hamutuk”, hatete Arsebispu Metropolita Díli iha nia omília.
Dom Vírgílio Kardeal hatete tuir sinodo bispu nian katak “Komuñaun, Partisipasaun no Misaun”, signifika ema hotu-hotu iha pastorál ne’e iha sentidu pertense ne’ebé kuda iha ida-idak nia fuan, hodi sai membru komunidade ne’ebé hola parte iha misaun nai Jesus Kristu nian.
“Furak ohin hamutuk iha sentru Pastorál ida ne’e ita inaugura ita-nia kapela ne’ebé sei sai hanesan fatin enkontru, fatin halo orasaun, simu no rona Maromak nia liafuan no simu Kristu nia futar isin. Kapela ida ne’e sei sai fatin transformasaun atu ema ida-idak modela nia aan tuir Jesus bom pastór”, Arsebispu haktuir.
Nune’e Mariano Assanami Sabino iha nia diskursu, hateten, Governu no Estadu Timor-Leste rekoñese igreja la’ós de’it hanesan fiar ida ba sarani katólika sira, maibé hanesan mós hanesan identidade ida ba nasaun, tanba fó ona kontribuisaun boot ba luta libertasaun nasionál.
“Husu komunidade iha bairru ne’e atu uza kapela ne’e hodi halo atividade oi-oin ba joven sira. Kapela labele sai de’it uma ida, maibé sai fatin ba sarani sira atu hasoru malu hodi ko’alia [kontribui ideia] la’ós de’it nu’udar sarani katólika maibé atu fó kontinuidade ba luta ba dezenvolvimentu”, Vise-Primeiru-Ministru ne’e afirma.
Amu pároku Parokia Santo António Motael, Pe. Guilhermino da Silva, konsidera kapela foun ne’e sai hanesan fatin hodi halo atividade “espiritual no formasaun fiar” atu nune’e moris sarani sira nian iha Bairro-Pité no iha sidade Díli bele sai di’ak liu tan liu husi testemuña ema ida-idak nian nu’udar sarani katólika.
Kapela ne’e harii iha 1998 no konstrusaun dahuluk iha 2008 no iha 2019 halo fali kontrusaun foun ho valór orsamentu rihun $93. Nune’e iha 2020 halo fali reabilitasaun no konklui iha 2023 husi kompañia Eureka Gagas Utama Unip.Lda, ho valór orsamentu rihun $130.
Apoiu ba konstrusaun ne’e mai husi governu liu husi gabinete apoiu sivil, husi Parokia Santo António Motael, husi emprezáriu balu no husi komunidade Sentru Pastorál Bairro-Pité.
Tuir dadus, sentru pastorál ne’e iha sarani hamutuk 2.454 ne’ebé mai husi husi aldeia TAT [Transporte de Aéreo Timor], Kakau-lidun no Fatumeta.
Jornalista : Afonso do Rosário
Editór : Rafael Ximenes de A. Belo
