COVALIMA, 22 Abríl 2024 (TATOLI) – Estrada Bee-Mean iha suku Fatuleto, aldeia Biata, postu Zumalai, munisípiu Covalima, liga bá munisípiu Bobonaro difikulta movimentasaun transporte públiku no privadu tanba impaktu husi dezastre naturál.
“Hanesan autoridade postu preokupa ho kondisaun estrada Bee-Mean tanba grave no difikulta movimentu transporte públiku no privadu tanba rai-halai no halo estrada kotu”, Administradór Zumalai, Alípio Magno, dehan.
Autoridade postu ne’e husu ba Obra Públika hodi apoia ekipamentu pezadu halo normalizaun ho urjénsia hodi loke estrada alternativa, nune’e bele fasilita movimentu transporte sira.
Diretór Servisu Obra Públika, Sidónio Gusmão, rekuñese katak presiza halo normalizasaun ba estrada Bee-Mean ne’ebé foin halo konstrusaun iha tinan kotuk, maibé kotu tanba impaktu husi dezastre naturál.
“Ami iha ona pedidu atu halo normalizasaun ba estrada Bee-Mean, inklui estrada sira seluk maibé presiza mós pedidu hosi administradór postu, nune’e ha’u halo submisaun iha diresaun nasionál”, nia esplika.
Dirijente ne’e informa katak daudaun ne’e Servisu Munisipál Obra Públika seidauk submete pedidu ba iha diresaun nasionál, tanba sei partisipa reuniaun konsellu konsultivu munisipál, hafoin remata enkontru bele submete ona pedidu ho karáter urjénsia, tanba estrada Bee-Mean kategoria estrada nasionál ne’ebé liha komunidade iha suku Lour, Lepo ho Mape, inklui populasaun hosi Bobonaro atu asesu bá merkadu iha Covalima.
Iha 14 Abríl 2023, eis-Ministru Obra Públika, Abel Pires da Silva, halo observasaun direta ba kondisaun estrada no orienta kedas tékniku Diresaun-Jerál Estrada, Ponte no Kontrolu Seia hamutuk ho empreza Aitula Fuel, Unipesoál Lda, mobiliza ekipamentu hodi halo normalizasaun ba estrada, nune’e bele fasilita movimentu transporte públiku no privadu liga husi munisípiu Covalima bá Bononaro.
Jornalista: Celestina Teles
Editora: Maria Auxiliadora
