PNTL halo apreensaun ba motorizada 78 tanba viola lei kódigu estrada
DILI, 22 abríl 2024 (TATOLI) – Xefe Departamentu Tránzitu Seguransa Rodoviaria Nasionál, Asistente Superintendente Polísia, Luis da Costa, hateten Tránzitu Nasionál liuhosi check point, iha fimdesemana foin lalais, ba karreta ho motor, konsege preende motorizada hamutuk 78.
“Durante ita halo check point iha sesta, ita konsege preende motorizada 78 tanba balun haluha dokumentu balun, laiha duni dokumentu, balun dokumentu liu prazu inklui balun karta kondúsaun mate. Tanba ne’e mak ita halo apreensaun ba motorizada sira-ne’e”, Asistente Superintendente Polísia, Luis da Costa hateten ba jornalista sira iha nia kna’ar fatin Komandu Jerál Caicoli, Segunda, ohin.
Nia subliña, iha lei númeru 6/2006 kona-ba kódigu estrada iha artigu 207, koalia klaru katak sé de’it kondús motorizada mak laiha dokumentu komprovativu hanesan karta kondúsaun laiha, karta kondúsaun mate ne’e viola ona regra kódigu estrada no PNTL pasa kedan billete infrasaun hodi haruka sira ba selu iha banku depois motorista foti fali sira-nia motór.
“Situasaun sira ne’e ita implementa, ita só impoin lei no regra ne’ebé ita iha maibé kestaun sira ne ladún efiseinte no efikasia maibé ita kontinua levanta ita uza meiu seluk mak ita bo’ot sira hatene pasa billete infrasaun nian ba ita-nian infrator sira”, nia salienta.
Nia husu ba motorista sira ne’ebé mak atu kondús transporte privadu hanesan motorizada no mós karreta sira atu bele lori dokumentu ne’ebé mak merese atu tau iha ita-nian transporte laran hanesan karta kondusaun, dokumentu transporte nian molok halo viajen.
Tanba dala barak ita halo check point, barak mak viola regra hodi fó razaun katak sira-nian dokumentu haluhan iha uma, sira-nian karta kondusaun rai hela iha uma,
“Maibé bainhira ami liuhosi pasa revista ami hetan iha balun mak nia dokumentu haluhan no ami haruka nia ba foti tiha iha uma depois ami entrega fali nia motor. Iha balun mak dokumentu laiha karta kondusaun laiha ami halo tiha apreensaun ba motorizada no pasa bilete ba nia”, nia afirma.
Luis husu ba membru polísia tránzitu sira atu nafatin firme hodi asegura no implementa lei kódigu Estrada no husu ba nafatin ba motorista sira atu kondús transposte labele haluha lori sasan ne’ebé mak esensiál atu iha check point ruma polísia tránzitu husu atu hato’o.
Komandante Tránzitu Nasional ne’e heteten, iha funsionáriu balun inklui membru PNTL no F-FDTL bainhira hetan apreensaun, mak laiha dokumentu tenke trata hanesan, laos fó liu de’it.
“Situasaun sira hanesan ne’e akontese iha kazu balun fó fali kartaun espesiál, ID Card, servisu ninian ne’e ami la presiza, ami presiza mak ne’e, o kondús karreta no motór ó tenke iha dokumentu ka lae, o nia karta kondusaun ne’e lori, laos ho fali kartaun polísia ou fó fali kartaun F-FDTL, ida-nee ami la presiza, ha’u la presiza ida”, nia dehan.
“Orientasaun ne’ebé ha’u fó ha’u nia-nia membru sira, ha’u koalia katak sé de’it mak atu iha kartaun PNTL ka kartaun F-FDTL, ida-ne’e la tuir lei ita nafatin aplika koima”, nia haktuir.
“Situasaun sira akontese iha terenu no ha’u rasik maka iha tempu ne’ebá, ha’u foti desizaun hodi ita prosesa tuir kódigu estrada ne’ebé mak iha, ema hotu iha lei nia okos, laiha ema atu fó o nia kartaun espesiál, ne’e sei la akontese. Lei kódigu estrada 6/2003, laiha tratamentu espesiál ba PNTL no F-FDTL, tanba lei kódigu estrada ne’e válidu ba ema hotu sé de’it ma sirkula iha via públiku ho transporte liuliu transporte privadu hotu iha lei nia okos”, nia konklui.
Jornalista: Natalino Costa
Editór : Zezito Silva
