DILI, 23 abril 2024 (TATOLI)–Prezidente Konsellu Nasionál Juventude (CNJTL), Maria Dadi Soares Magno, hateten edukasaun hosi família ba membru familia nu’udar aliserse ida hodi forma ema-nia karáter iha sosiedade, tanba família ida-ne´ebé metin ne´e sosiedade mós metin.
“Formasaun ne’e fundamentu hosi família. Bainhira familia ida nia formasaun metin, ba iha sosiedade sei metin. Edukasaun ka dutrina hosi familia metin mak sosiedade mos metin,” Prezidente CNJTL, Maria Dadi Soares Magno, hateten ba Agência Tatoli, nakait ho karta pastorál Paskua 2024 ne´ebé fó sai iha domingu resureisaun 31 Marsu, iha nia kna’ar fatin. Faról, tersa ne´e.
Iha aspetu sosiál, nia hateten, Timor-Leste hasoru hela krize sosiál katak relasaun entre ema ida ba ema seluk, ne’ebé bei’ala sira uluk kuda ona iha timóroan sira-nia fuan hahú mihis no sentimentu unidade nu’udar timóroan hahú lakon.
Ohin loron, infiltrasaun husi ideia sira grupuizmu nian, ne’ebé halo foinsa’e sira barak halis grupu ida hodi sai funu-baluk ba grupu seluk, entaun movimentu no grupu balun iha sosiedade nia le’et ne’ebé hanorin kona-ba ódiu no vingansa, violénsia no krime maun-alin oho malu.
Nia esplika, joven sira envolve-aan iha situasaun sira-ne’e tanba ladún fó importánsia ba sira-nia aan rasik ka dalaruma sente sai joven ne´ebé importante ba família, kreda no ba sosiedade.
“Ba joven sira atu investe sira-nia aan iha valor no prinsípiu sira hanesan fiar kreda nian, kultura no istória. Se valór tolu (3) ne’e mak kuda ona iha família ida-idak, buat hotu sei sai di’ak tuir ema hotu nia hakarak,” nia esplika.
Daudaun ne´e, nia hateten, foinsa’e barak mak haliis ba grupu balun ne’ebé hatudu momoos katak iha diferensa grupu laiha ona interrese komun nian, entaun hamosu krime no violénsia.
Tanba ne’e, tuir nia, karta pastorál ba Paskua 2024 ne´e hanesan reflesaun, rekomendasaun no sujestaun ida ba Estadu liliu kona-ba asuntu sosiál ne’ebé Governu tenke haree atu rezolve.
“Karta pastoral ne´e pertinente tebes atu Governu bele kria espasu ka empregu hanesan investe iha indústria. Governu iha ona aproximasaun bilaterál hodi joven sira ba servisu iha rai-li’ur,” nia hateten.
Kona-ba preokupasaun ne´e, nia hateten, Governu Timor-Leste halo ona akordu bilaterál ho Austrália no Korea Súl hodi lori joven timoroan barak mak servisu iha rai rua ne´e, ajuda tona ekonomia família no halo mudansa.
“Ha’u sente orgullu, tanba bele hadi’a sira-nia moris,” nia dehan.
Tanba ne´e, nia husu ba Governu atu ba oin tenke halo kooperasaun bilaterál ho nasaun sira seluk, nune’e mos dezenvolve setór públiku, privadu no kooperativa iha rai-laran.
Ida-ne’e importante tebes, tanba númeru joven produtivu iha rai laran-barak liu metade hosi totál populasaun timorense.
CNJTL sei halo nia papel hodi fó formasaun ba jovens sira hodi bele iha diálogu ida entre grupu hotu-hotu oinsá atu bele fó sira-nia kontribuisaun ba dezenvolvimentu nasionál.
Jornalista : Jesuína Xavier´
Editór : Cancio Ximenes
