Janeiru to’o Marsu, Sentru Saúde Uatucarbau rejista pasiente ISPA 1.000
VIQUEQUE, 23 abríl 2024 (TATOLI)-Xefe Sentru Saúde Postu Uatucarbau, munisípiu Viqueque, Jerimias Mota, informa hahú inísiu Janeiru to’o Marsu 2024, rejista pasiente moras Insfesaun Respiratóriu Aguda (ISPA) hamutuk 1.000.
“Durante trimestrál dahuluk hahú husi Janeiru to’o Marsu, ami konsege rejista pasiente ISPA purvolta na’in-1,000 ne’ebé konsege halo tratamentu iha sentru ne’e no rekupera hikas ona”, dehan Jerimias Mota, hateten ba Agência TATOLI, iha resintu postu Uatucarbau, ohin.
ISPA hanesan virus ida ne’ebé ninia impaktu mai husi rai-rahun, hemu bee matak, nune’e husu komunidade sira atu hatoman an uza maskára no hemu bee nono.
“Ita-nia pesoál saúde fó atedimentu ba pasiente moras ISPA liuliu fó ai-moruk hanesan parcetamól no atibiotika seluk”, nia afirma.
“Kona-ba tratamentu ne’e ami fó ai-moruk hodi hemu. Alende ai-moruk, ami mós fó hanoin ba ita-nia pasiente sira hemu bee manas no suas bee maas ne’e bele rekupera. Durasaun moras ne’e durante loron tolu ka to’o loron lima ne’e moras lakon mesak”, nia afirma.
Nune’e, nia husu ba abitante postu Uatucarbau bainhira sente moras ISPA tenke bá konsulta iha sentru saúde no postu saúde sira-ne’ebé lokaliza iha suku hodi halo prevensaun ba moras referidu.
Daudaun, Xefe Sentru Saúde ne’e dehan estoke ai-moruk iha sentru saúde Uatucarbau sei sufisente.
“Kona-ba ai-moruk ba ami ladun problema ba estouk ai-moruk tanba ami halo pedidu husu ai-moruk ne’e rutina, ne’ebé ami haruka pedidu kada fulan tolu ba servisu saúde Viqueque sira sempre responde kedas. Ami bele dehan katak estoke sei iha hodi responde ba abitante sira,” nia afirma.
Jornalista:Vitorino Lopes da Costa
Editór : Florencio Miranda Ximenes
