MCI husu Empreza Bee Leste atu partisipa iha feira nasionál
AILEU, 23 abríl 2024 (TATOLI) – Vise Minsitru Komérsiu no Indústria husu ba Empreza Bee Leste atu partisipa iha feira nasionál hodi Komemora Loron Restaurasaun Independeénsia 20 Maiu ba dala 22 iha Portu Dili.
“Ohin mai vizita iha Empreza Bee Leste ida-ne’e atu husu sira-nia disponibilidade atu ba partisipa iha feira nasionál iha loron 15 to’o 20 maiu iha portu Dili hodi Komemora Loron Restaurasaun Independénsia 20 Maiu ba dala 22”, Vise Ministru Komérsiu no Indústria Agostu Trindade Junior, dehan ba jornalista sira iha Aileu Kasnafar, ohin.
Nia hateten, MCI halo hela kampaña ba produtu indústria sira ne’ebé mak iha rai laran hanesan Bee Leste, Gota, Freska, Kafe, Masin, Marmelhada no Xha.
“Ohin mai vzita fatin ida-ne’e atu hatene de’it sira-nia kapasidade produsaun bee ne’e, oinsá no kualidade ne’e oinsá, entaun ida-ne’e mak ohin ita ba laboratóriu atu haree katak sira-nia bee ne’e minerál los, tanba durante sira teste seidauk haree bateria ruma iha ne’eba no bee ida-ne’e kualidade tebes, entaun ida-ne’e mak ita halo hela kampaña ba bee tolu ne’e rasik”, nia afirma.
Nia esplika, MCI sei reuniaun iha aban dader iha ministériu hodi ko’alia kona-ba bee tolu inklui kafe, masin no seluk tan, entaun saida mak Governu atu halo ba oin husi vizita ida-ne’e no aban sei deside iha ne’eba.
“Ita labele mai vizita de’it, depois ba oin kontinua laiha ida-ne’e, ha’u sente ladún di’ak, entaun ita tenke promove nafatin atu ita uza ita-nia produtu ida-ne’e iha ita-nia rain. Tanba ne’e mak bee tolu ne’e, Governu halo promosaun atu bele partisipa iha feira ne’ebé mak sei loke iha fulan-Maiu”, nia esplika.
Iha fatin hanesan, Jerente Empreza Leste, Pedro Morante, hateten Bee Leste, hahú tama iha merkadu, iha fulan-Dezembru 2023 no distribui ona ba iha territóriu nasionál.
“Ami-nia bee disponivel ba kualker tempu hodi distribui ba munisípiu sira, tanba kada loron ami prodús ne’e depende ba nesesidade, entaun kapasidade mákina ne’ebé ami prodús hamutuk 25mil botir kada oras ida, entaun ami-nia kalkulasaun ba konsumu nasionál ne’e ba TL tomak”, Pedro Morante relata.
Nia dehan, produtu Bee Leste ida-ne’e empreza manda ona amostra ba nasaun Singapura, Austrália, Filipina no planu atu halo esportasaun ba Malazia no Dubai iha tinan ida-ne’e nia laran.
“Ami husu ba Governu atu nafatin fó atensaun ba setór sira hotu, nune’e bele prodús bee ho di’ak iha Timor-Leste”, nia haktuir.
Nia afirma, difikuldade ne’ebé empreza hasoru mak taxa plástiku liuliu materiál halo botir sira ne’ebé ajénsia aplika ba bee timor ho selu 30%, maibé ba bee husi rai liur, taxa kiik, entaun ida-ne’e mak problema ne’ebé durante ne’e iha.
Pesoál ne’ebé mak servisu iha Empreza Bee Leste hamutuk liu 50, hosi hirak ne’e, iha ema estranjeiru no timoroan.
Jornlaista : Felicidade Ximenes
Editór : Zezito Silva
