DILI, 23 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) implementa projetu pilotu hodi kuda fini hare iha Vemase-Baucau no Maliana I-Bobonaro, ne’ebé oferese husi nasaun Brunei.
Diretór-Jerál Agrikultura, Kafé no Planta Industriál, Martinho Laurentino Soares, haktuir katak fini hare sira ne’e Brunei fornese iha pakote rua, ne’ebé ministériu fahe ida ba Baucau no seluk ba Maliana.
“Kuandu iha ona rezultadu maka sira sei mai fali atu diskute liután asuntu ne’e ho Governu, nomós ho Ministériu Agrikultura no sira prontu atu halo investimentu boot. Sira husu ona natar kuaze ektare 40 hodi kuda hare Brunei iha Timór, nune’e bele hasa’e produsaun atu redús importasaun foos”, Martinho Soares hateten ba jornalista sira iha Comoro, ohin.
Tuir nia, fini hare Brunei ne’ebé kuda iha fatin rua ne’e hatudu ona progresu di’ak iha 75% no tuir planu sei realiza serimónia lansamentu ba kolleta fini ne’e iha fulan oin ne’ebé sei hetan partisipasaun husi na’in-ulun sira.
Kooperasaun entre MAP no delegasaun husi nasaun Brunei ne’e realiza ona iha Dezembru 2023 no Brunei iha kompromisu hakarak investe iha setór agrikultura, entaun nasaun ne’e oferese fini hare ho kuantidade rihun ida ba ministériu hodi kuda.
“Karik Timór ne’e serve duni atu kuda fini hare husi Brunei maka ba oin sira sei kontinua diskute nia prosesu. Fini sira ne’e seidauk kuda iha natar, maibé ministériu prepara hela rai metru 100 apoiu ho bee sufisienste iha Vemasse no Maliana I hodi realiza projetu pilotu ne’e”, salienta.
Jornalista: Tomé Amado
Editora: Maria Auxiliadora
