DILI, 24 abríl 2024 (TATOLI)—Komisaun E trata asuntu Infraestrutura iha Parlamentu Nasionál (PN) rekomenda ba Ministériu Obras Públika (MOP) atu orienta kompañia aselera projetu estrada diresaun Humboe ba Ermera Lama no Mertutu to’o Vila Maria.
Notísia Relevante: Deputada PD husu Governu halo intervensaun rápida ba estrada Ermera
Prezidente komisaun E lideradu husi deputadu Marcos Xavier, akompañadu husi deputadu membru komisaun iha fulan-marsu tinan halo fiskalizasaun ba iha munisípiu Ermera ho objetivu atu observa projetu sira infraestrutura atu haree rasik ezekusaun fíziku projetu tinan 2023 nian no atu rona mós dezáfiu ne’ebé kompañia sira hasoru iha terenu.
Nune’e, komisaun E halo vizita no fiskaliza projetu estrada diresaun Humboe ba Ermera Lama no Mertutu to’o Vila Maria, komisaun observa obra ne’e la’o tarde uitoan.
“Nune’e, Komisaun E rekomenda ba Ministériu ObrasPúblika (MOP) atu orienta kompañia hodi aselera projetu estrada diresaun Humboe Ermera Lama no Mirtutu to’o Vila Maria,” rehaktuir relatóriu komisaun E ne’ebé Agência Tatoli asesu, kuarta ne´e.
Tuir relatóriu komisaun nian ba projetu manutensaun estrada trosu Humboe-Ermera Lama no Mertutu-Vila Maria halo husi kompañia Betuhei Unipesoál, Lda, ho nia valór kontratu hamutuk $421,144.00.
Tuir informasaun ne’ebé komisaun rekolla iha terrenu katak, obra ida-ne’e atraza uitoan tanba obra nia fíziku foin atinje 4.79%, tanba estrada diresaun Humboe ba Ermera Lama laiha dalan alternativu ba komunidade no transporte públiku sira hodi asesu.
Ho nune’e, durante implementasaun obra iha terrenu kompañia labele serbisu ho másimu tanba ezijénsia husi transporte públiku no privadu sira husu kompañia atu fó espasu ka para serbisu iha oras balun, hodi nune’e movimentu transporte bele la’o ho normál, aleinde fatór klíma udan sempre impede prosesu serbisu iha terrenu.
Mezmu nune’e, komisaun nafatin rekomenda ba MOP atu orienta kompañia hodi aselera projetu ne’e.
Aleinde ne´e, komisaun rekomenda mós ba MOP atu fó atensaun ba kompañia Faniki Unipesoál, Lda, ne’ebé mak abandona hela obra reabilitasaun estrada trosu Marobo-Hatolia pakote tolu.
Tuir lista projetu fundu infraestrutura reabilitasaun estrada rurál iha munisípiu Ermera katak, reabilitasaun estrada trosu Marobo-Hatolia ho kustu $4,853,396.20 no obra nia fíziku iha terrenu foin atinje 64.14%, husi fulan-novembru 2021 to’o juñu 2023 obra ne’e paradu, no iha jullu 2023 kompañia hatama fali pedidu ba extensaun serbisu.
Entretantu, relatóriu komisaun nian ne’e iha segunda liu ba Prezidente Parlamentu Nasionál halo ona distribuisaun hodi haruka mós kopia ba Governu hodi bele tau atensaun.
Jornalista : Nelson de Sousa
Editór : Cancio Ximenes
