Problema edukasaun iha Ermera: Manorin-na’in no kondisaun eskola
ERMERA, 24 abríl 2024 (TATOLI)—Diretór Servisu Edukasaun Munisípiu Ermera, Francisco Marto de Araujo, informa, problema edukasaun ne’ebé mak hasoru iha Munisípiu Ermera mak menus manorin-na’in no fasilidade eskolár balun la di’ak ona atu akumula estudante sira hodi tuir atividade letiva iha estabelesimentu ensinu.
“Edukasaun iha Ermera, ita iha problema rua; primeiru mak ita-nia profesór la to’o no segundu mak ita-nia edifísiu sira hanesan kadeira no meza kondisaun aat entaun difikulta ba estudante sira atu simu matéria,” Francisco Marto de Araujo informa ba TATOLI iha Edifísiu Servisu Edukasaun Munisípiu Ermera, ohin.
Ezekutivu ne’e dehan, husi profesór sira iha Ermera re-ingresu hamutuk 630, ida ne’e mós seidauk kobre ba iha munisípiu Ermera tomak, espera katak sira ne’ebé mak tuir teste daudaun ne’e bele hetan profesór espesifiku balun liu-liu hetan sira ne’ebé lori matéria Inglés, Portugés, Matemátika no Kímika entaun iha tinan ne’e bele kompleta ona manorin sira iha ne’e.
“Ita-nia target (alvu) ba profesór iha Ermera ne’e presiza tan 500 atu bele rezolve anível ensinu báziku no mós pré-eskolar sira maibé ida ne’e la inklui ho sekundáriu sira,” nia afirma.
Responsável edukasaun munisipál ne’e esplika, númeru profesór daudaun ne’e seidauk sufisiente tanba profesór balun mate no balun idozu barak entaun presiza halo rekuperasaun fila fali, tanba ne’e mak presiza tan 500 ba eskola sira iha Ermera.
“Totál ensinu báziku iha Ermera hamutuk 22 no eskola filiál hamutuk 171 iha Munisípiu Ermera, maibé iha kada eskola manorin sira iha na’in rua de’it ida-ne’e problema boot. Entaun, husu atu aumenta tan profesór nune’e ita bele hanorin estudante sira ho di’ak. Maibé, iha eskola balun klase to’o neen iha profesór na’in haat, maibé ida-ne’e mós presiza aumenta. Depois, eskola balun iha profesór neen kompletu maibé ita haree ba idade 60 ba leten ona, entaun tuir lei ema ne’ebé mak idade ne’e tama ona pensaun, tanba ne’e mak ita presiza halo kalkulu ida atubele aumenta hodi bele hanorin estudante sira ba oin ho di’ak,”nia informa.
Tanba ne’e autoridade edukasaun munisípiu Ermera ne’e husu ba Ministériu Edukasaun atubele haree no rezolve problema edukasaun iha Munisípiu Ermera liu-liu ba profesór sira ne’ebé mak daudaun ne’e hasoru hela problema.
“Ko’alia kona-ba fasilidade eskola liu-liu meza no kadeira balun aat ona presiza troka. Ida-ne’e ami haree katak ita tenke tau atensaun, tanba estudante sira ne’e atu simu matéria ruma presiza tuur no hakerek, presiza tau iha meza. Agora, kona-ba hira mak aat hira mak di’ak ne’e ha’u la iha númeru ezatu, maibé dalaruma ha’u ba terrenu haree katak kondisaun meza no kadeira la di’ak, barak,” nia hateten.
Diretór Servisu Edukasaun Munisípiu Ermera, Francisco Marto de Araujo informa mós katak estabelesimentu ensinu ida iha Railaco Kraik, no ida iha Postu administrativu Ermera presiza hadi’a liu-liu iha infraestutura sira, tanba haree ba kondisaun aat ona, entaun ida-ne’e difikulta ba estudante sira atu halo aprendizajen iha fatin referidu.
“Atu rezolve problema kondisaun eskola no infraestutura eskola sira, mak dahuluk Munisípiu Ermera la iha kbiit, maibé ita hatama iha planu munisipál nian ba orsamentu 2025. Entaun, ida-ne’e ita halo ona planu atu nune’e autoridade munisipál bele lori ona ba komisaun revizaun orsamentu hodi haree ba tinan oin oinsá bele hadi’a nune’e bele estudante sira uza hodi simu matéria hosi profesór sira ho di’ak,” nia konklui.
Jornalista : Felicidade Ximenes
Editór: Rafael Ximenes de A. Belo
