DILI, 24 abríl 2024 (TATOLI)— Reitór Universidade Nasionál Timor Lorosa’e (UNTL), João Martins, hatete, buka tenta hodi rezolve dosente menus iha Fakuldade Direitu iha UNTL.
“Prontu ami tenta atu rezolve ida-ida, tanba ita iha dekanu foun, tanba kestaun fakuldade ne’e, husi fakuldade mak rezolve, kuandu sira labele rezolve ona, ne’e ami bele rezolve,” Reitór dehan ba TATOLI, hafoin konferénsia imprensa, iha salaun UNTL, Dili, kuarta ne’e.
Antes ne’e, portavós Estudante Direitu, José da Costa, hatete Magnifiku Reitór ho nía estrutura ne’ebé halo nia funsaun la ho di’ak hanesan: Vise-Reitór Asuntu Akadémiku no Garantia Kualidade, Vise-Reitór Asuntu Administrasaun, Finansas no Administrasaun Jerál, Pro-Reitór ba Asuntu Planeamentu, Monitorizasaun no Avaliasaun, Pro-Reitór ba Asuntu ba Inspeksaun, Auditóriu no Kontrolu ba Kualidade”, nia dehan.
Tanba efeitu husi má jestaun, ne’e nia implikasaun mak hamosu problema hirak-ne’ebé Fakuldade Direitu enfrenta, hanesan falta dosente permanente no kontratadu, inkumprimentu ba kalendáriu UNTL no mós problema sira seluktan, ne’ebé asosiasaun deklara ona iha komunikadu imprensa iha semana kotuk.
“Husi ami-nia investigasaun, problema hirak-ne’e nu’udar kestaun jerál ne’ebé fakuldade hotu-hotu enfrenta iha UNTL. Husi problema hirak-ne’ebé mensiona iha leten, ami estudante ativu husi Fakuldade Direitu, hakarak ezije ba reponsável másimu UNTL hanesan Magnifiku reitór ho nia estrutura tomak hodi tomak medida adekuadu atu rezolve problema hirak-ne’e iha tempu-badak,” portavós dehan.
“Tanba ne’e, ami hakarak ezije ba Ministériu Ensinu Superiór atu halo kontrolu másimu ba nia orgaun tutelar UNTL tanba hafoin ami aprezenta deklarasaun ba apresiasaun no kontestasaun hasoru deklarasaun husi asosiasaun Fakuldade Direitu nian ne’ebé sita iha leten,” nia reiteira.
Ho preokupasaun sira-ne’e, portavós husu ba Asosiasaun Fakuldade Direitu, atu labele foti konkluzaun la ho investigasaun ne’ebé kle’an, hodi fó kulpa pesoál dosente sira.
“Sujere ba estudante Fakuldade Direitu atu valoriza no dignifika dedikasaun dosente sira nian ne’ebe durante hanorin ita maske iha má jestaun husi ekipa reitoriál UNTL. Sujere ba mós asosiasaun estudantil Fakuldade Direitu atu hatuur nia pozisaun ho loloos ba reprezentasaun estudante hotu-hotu”, nia dehan.
Tanba ne’e husu ba estudante no dosente akadémika atu sai lian ida hodi ezije ba UNTL atu intervein lalais hodi solusiona problema ne’ebé Fakudade Direitu infrenta tinan barak.
“Ami hakarak enkoraja nafatin ba pesoál dosente permanente, kontratadu inklui dosente voluntáriu atu mantein ka hatudu nafatin profisionalizmu nu’udar dosente ne’ebe durante ne’e hanorin ami. Ami estudante ativu husi Fakuldade Direitu halo komunikadu imprensa ida-ne’e ho objetivu atu hatuur loloos problema ne’ebé akontese problema iha fakuldade direitu”, nia dehan.
Jornalista : Osória Marques
Editór: Rafael Ximenes de A. Belo
