Xefe Estadu sei partisipa selebrasaun aniversáriu revolusaun ai-funan iha Portugal
DILI, 24 abríl 2024 (TATOLI) –Prezidente Repúblika, José Ramos Horta, ho delegasaun to’o ona Portugál hodi partisipa selebrasaun aniversáriu revolusaun ai-funan (revolução dos Cravos) ba dala-50 ne’ebé selebra iha loron kinta (25 abríl).
Xefe Estadu ho delegasaun to’o iha Lisboa, iha loron 23 abríl, tuku 07:35 dadersan oras Lisboa, ekipa simu direita husi Embaixadora Timor-Leste ba Portugal, Isabel Amaral Guterres no Embaixadora CPLP, Laura Soares Abrantes.
“Vizita Prezidente Repúblika ho nian delegasaun ba Lisboa, Portugál ne’e hodi responde ba konvite ofisiál husi Prezidente Repúblika Portugueza, Marcelo Rebelo de Sousa, hodi partisipa iha serimónia aniversáriu revolusaun Ceavos ba da-50,” refere nota ne’ebé Agência TATOLI asesu iha portal Prezidente Repúblika.
Ekipa delegasaun Prezidente Repúblika, kompostu husi Tenente Jenerál (reformadu), Lere Anan Timur, Asesór no Inklui mós delegasaun husi mídia balun iha Timor-Leste nian.
Durante iha Portugal, Prezidente sei iha enkontru ho Prezidente Repúblika Portugueza, Marcelo Rebelo de Sousa, Prezidente Asembleia Nasionál, José Pedro Aguiar-Branco no Primeiru-Ministru, Luís Montenegro.
Xefe Estadu mós sei iha ajenda adisionál balun hanesan partisipa iha seremónia kondekorasaun iha Embaixada Timor-Leste iha Portugal no partisipa iha selebrasaun relasaun diplomátiku entre Diwan Ismaili Imamat no Lusofonia.
Hafoin husi Portugal, Prezidente Repúblika sei halo viajen ba New Jersey iha loron 29 abril, no sei hato’o dikursu formatura iha Universidade Rutgers no Prezidente Ramos Horta sei simu onra “Doutor Honoris Causa” husi Universidade Rutgers.
Jornalista: Hortencio Sanchez
Editór : Florencio Miranda Ximenes
