CET ezekuta subvensaun maioria ba área edukasaun
DILI, 24 abri 2024 (TATOLI)–Padre Vigáriu Jerál Arkidioseze Metropolitana Dili, Graciano dos Santos Barros, hateten Conferensia Episkopal Timorense (CET) simu subvensaun hosi Governu no ezekuta subvensaun maioria ba área edukasaun no asaun sosiál iha dioseze tolu no governasaun ekleziatika.
Notísia Relevante: Kada tinan, Governu fó subvensaun millaun $15 ba Igreja Katólika
“Governu fó subvensaun ne’e ba igreja tenke liuhusu akordu anuál. Ida-ne’e liuhusi aprovasaun previa Santa Sé Nunsiatura iha Timor-Leste,” Vigáriu Jerál Arkidioseze Dili, Graciano dos Santos Barros, ba Tatoli iha sede episkopál iha Lecidere.
Nia hateten, implementasaun ba iha área edukasaun halai liuba programa konstrusaun fíziku eskola sira, ezemplu hanesan Universidade Katólika Timorense (UCT) ho nia ekipamentu hanesan laboratóriu no seluk tan.
Obra físku seluk, nia dehan, ba konstrusaun igreja Hatulia inaugura ona no igreja Aileu ne´e, obra la’o hela no Fatuberliu iha Welaluhu.
Subvensaun ba asuntu sosiál, nia hateten, mak tau matan ba orfanatu sira, harii uma ba ema kbiit laek sira liuhusi programa Caritas no ajuda mós populasaun sira-ne’ebé afeta ba inundasaun no dezastre naturál.
Amululik ne’e mos hateten, subvensaun ne´e mós utiliza ba finansimentu estudu saserdote no seminarista sira, tanba saserdote sira ba estuda iha rai-li’ur entre tinan rua to’o lima, ba estudu ne’ebé balun termina ona sira-nia estudu.
Subvensaun ne’ebé destina ba asuntu governasaun ekleziastika implementa ba iha servisu no administrasaun no salariu ba funsionáriu sira.
Nia hateten, CET simu subvensaun Governu nian hahú iha tinan 2017, tanba Parlamentu Nasionál retifika iha 2016.
Estadu Timor-Leste ho Estadu Vatikanu asina akordu konkordata ida atu Governu timorense bele aloka subvensaun ba iha igreja, nune’e mós Governu ho igreja mos kontinua asina akordu kuadru kada tinan lima.
Iha tinan ida-ne’e, Governu ho CET asina tan akordu anuál ba subvensaun ba atividade uma kreda nian ho totál orsamentu $15 millaun.
Jornalista : Jesuína Xavier
Editór : Cancio Ximenes
