Ermera-Profisionál saúde seidauk sufisiente maske koloka ona 120
ERMERA, 26 abríl 2024 (TATOLI) – Diretór Servisu Saúde Ermera (SSE), António de Deus Fátima rekoñese, profisionál saúde iha Munisípiu Ermera, seidauk sufisiente hodi halo atendimentu ba populasaun sira iha Ermera.
“Iha fulan-Marsu, Munisípiu Ermera hetan kolokasaun ba enfermeiru, parteira, saúde públika no mós tékniku aliadu sira hamutuk 120, entaun husi númeru ne’e ita koloka hotu ona ba sentru saúde no postu saúde sira no balun mai apoiu iha servisu saúde munisípiu nian, entaun ida-ne’e ami rekoñese seidauk to’o, ho nune’e ami halo fila fali mapamentu hodi aprezenta iha Ministériu Saúde, karik iha rekrutamentu ba faze daruak nian, koko atu tau nafatin profisionál saúde sira mai iha ne’e, hodi bele priénxe kondisaun mínimu sira iha Ermera”, António de Deus Fátima dehan ba TATOLI iha nia kna’ar fatin, Ermera 24/04/2024.
Nia afirma, tuir planu Governu nian katak kada postu saúde ida tenke tau ema na’in-lima to’o hitu, atu bele halo atendimentu ba poluasaun sira maibé agora iha Munisípiu Ermera sei menus profisionál saúde.
“Planu Governu nian ne’ebé mak iha, kada postu saúde ida tenke tau ema na’in-lima to’o hitu atu bele halo atendimentu ba poluasaun sira ne’ebé mai halo tratamentu saúde”, nia esplika.
Nia husu ba Ministériu Saúde atu aumenta tan karreta ambulánsia atu bele kobre ba postu no sentru saúde iha Ermera tomak.
“Ami-nia ambulánsia ida-ne’e, ami haree seidauk sufisiente, tanba ita haree Ermera populasaun barak no hela iha área rurál, entaun kada sentru saúde presiza tan karreta operasionál sira, nune’e bele apoiu progarma Sistema Integradu Saúde Komunitaria (SISCA), atu bele fó atendimentu ba komunidade sira iha baze hodi hasa’e ita-nia kobertura no bele hasa’e atinjimentu ba programa sira ne’ebé mak munisípiu iha”, nia konklui.
Jornalista : Felicidade Ximenes
Editór : Zezito Silva
